एअरपोर्टवर २ विमानांची टक्कर, क्षणात आगीचे लोट उठले, ९ जणांचा मृत्यू, VIDEO समोर

अमेरिकेतील कोलोरॅडो राज्यात भीषण विमान अपघात घडला आहे. फोर्ट मॉर्गन म्युनिसिपल विमानतळावर दोन विमानांची टक्कर झाली. टक्कर होताच दोन्ही विमानांना आग लागली आणि विमानं खाली कोसळली. विमान अपघातात ९ जणांचा मृत्यू झाल्याचे वृत्त आहे. पण अद्याप अधिकृत माहिती समोर आलेली नाही. मॉर्गन काउंटी शेरिफ कार्यालयाने विमान अपघाताची माहिती दिली आहे.

मॉर्गन काउंटी शेरिफ कार्यालयाकडून मिळालेल्या माहितीनुसार, सकाळी १० वाजून ४० मिनिटांनी कोलोरॅडोमधील फोर्ट मॉर्गन म्युनिसिपल विमानतळाजवळ हा अपघात झाला. दोन्ही विमाने एकमेकांना ओलांडताना अचानक आदळली.

मॉर्गन विमानतळाच्या एटीसी टॉवरवर बसवलेल्या कॅमेऱ्यात विमान अपघात कैद झाला आहे. ज्याची क्लिप पोलीस आणि माध्यमांना उपलब्ध करून देण्यात आली आहे. व्हिडिओमध्ये दुरवरून काळ्या धुराचे लोट दिसत आहे. राष्ट्रीय वाहतूक सुरक्षा मंडळ (एनटीएससी) आणि संघीय विमान प्रशासन यांनी विमान अपघाताच्या चौकशीला सुरूवात केली आहे.

जानेवारी २०२५ मध्येही अशा प्रकारचा अपघात घडला होता

२९ जानेवारी २०२५ रोजी अमेरिकेतही अशाच प्रकारची २ विमानांची टक्कर झाली होती. अमेरिकन एअरलाइन्स फ्लाइट ५२४२चे बॉम्बार्डियर सीआरजी७०० विमान युनायटेड स्टेट्स आर्मी सिकोर्स्की यु-एच ६० ब्लॅक हॉक हेलिकॉप्टरशी टक्कर झाली होती. टक्कर होताच दोन्ही विमानांना आग लागली होती. पोटोमॅक नदीवर आकाशात दोन्ही विमाने टक्कर झाली. या अपघातात ६७ जणांना जीव गमवावा लागला.