Kansas Firing News: धक्कादायक! कॅन्सस शहरात अंदाधुंद गोळीबार; दोघांचा मृत्यू,२२ जण जखमी

US Firing:

अमेरिकेतील कॅन्सस शहरातून एक मोठी बातमी समोर आली आहे. ‘सिटी चीफ्स सुपर बाउल’ या स्पर्धेच्या विजयाचा उत्सव सुरू असताना शहरात गोळीबार झाला आहे. गुरुवारी ही थरारक घटना घडली. या घटनेत आतापर्यंत २ जणांचा मृत्यू आणि २२ जण जखमी झाले आहेत.

खेळात विजय मिळवल्यावर एक परेड रॅली काढण्यात आली होती. या रॅलीवर अचानक अज्ञातांकडून गोळीबार करण्यात आला. घटनेची माहिती मिळताच कॅन्सस शहराचे पोलीस प्रमुख स्टेसी ग्रेव्हज घटनास्थळी दाखल झाले.

माध्यमांशी बातचीत करताना त्यांनी सांगितले की, या दुर्घटनेनंतर तीन जणांना ताब्यात घेण्यात आलं आहे. क्रीडा स्पर्धेदरम्यान सहभागी झालेल्या काही व्यक्तींनी संशयीतांना पकडण्यासाठी पोलिसांना मदत केली. संबंधित संशयीत आरोपी नेमके कोण आहेत? याबाबत अद्याप कोणतीही माहिती समोर आलेली नाही.

ग्रेव्हज यांनी यावर प्रतिक्रिया देत पुढे म्हटलं की,"येथे घडलेली घटना अत्यंत दुर्दैवी आहे. उपस्थित सर्व व्यक्तींना येथे सुरक्षित आणि चांगल्या वातावरणाची अपेक्षा होती. सदर गोळीबार का झाला? त्यामागील हेतू काय होता? याबाबत पोलीस अद्याप तपास करत आहेत.

डेन्व्हर शहरात एमबीए चॅम्पियनशिपमध्येही गेल्या वर्षी अशीच गोळीबाराची घटना घडली होती. गोळीबारामुळे तेव्हाही बऱ्याच व्यक्ती जखमी झाल्या होत्या. काही दिवसांपूर्वी न्यूयॉर्कच्या सबवे स्टेशनच्या प्लॅटफॉर्मवरही गोळीबार झाला होता. या सर्व घटनांमुळे शहरात नागरिकांमध्ये भीतीचं वातावरण पसरलं आहे.