'तुमच्या जुलुमांना घाबरणार नाही...'; भाषण सुरू असताना स्टेजवरच ओवैसी रडले

हैदराबाद: सध्या देशभरात मुस्लिमांवर अत्याचार झाल्याच्या अनेक घटना उघडकीस येत आहे. त्यातच मशिद, भोंगा आणि हनुमान चालिसा, हा वाद देखील गाजत आहे. मुस्लिमांवर वाढत्या अत्याचाराबाबत ओवैसींनी (Asaduddin Owaisi) दु:ख व्यक्त केलं आहे. शुक्रवारी हैदराबादमध्ये (Hyderabad) नमाज पढल्यानंतर AIMIM प्रमुख असदुद्दीन ओवेसी भावूक झाले आणि भाषणादरम्यान त्यांना रडू कोसळलं. (AIMIM Leader Asaduddin Owaisi Emotional Speech After Namaz Hits At Bjp)

भाषणादरम्यान ओवैसी म्हणाले की, खरगोनमध्ये (Khargone) मुस्लिमांच्या घरांची तोडफोड करण्यात आली. तसेच जहांगीरपुरीतील मुस्लिमांवर भयंकर अत्याचार झाले, येथील मुस्लिम दुकानदारांची दुकानं उद्ध्वस्त करण्यात आली. मुस्लिमांवरील या अत्याचाराचं मला खूप दु:ख होत आहे. मी अत्याचार करणाऱ्यांना एक गोष्ट सांगतो की, आम्ही मुस्लिमांवरील अत्याचार कदापि सहन करणार नाही. कारण, आम्ही मृत्यूला आणि तुमच्या राजवटीला कधीच घाबरत नाही. यापुढं आम्ही संयमानं काम करू आणि मैदान सोडणार नाही, असा इशारा ओवैसींनी दिलाय.

हैदराबादमध्ये नमाज पढल्यानंतर ओवैसींनी मुस्लिम बांधवांसोबत संवाद साधला. या संवादादरम्यान ते भावूक झाले. देशात एका विशिष्ट समुदायाला लक्ष्य केले जात असल्याचा आरोपही त्यांनी केला. ओवैसी म्हणाले की, माझ्या नजरेसमोर अशा अनेक घटना घडल्या आहेत, ज्यात थेट एका विशिष्ट धर्माच्या लोकांवर कारवाई झाली. भाषणादरम्यान अनेक वेळा ओवेसींच्या डोळ्यात पाणी आलं होतं. अल्पसंख्याकांवरील कारवाईमुळे ते संतप्त झाले होते.

नुकतंच राजस्थानमधील अलवर येथील 300 वर्षे जुने मंदिर पाडल्याप्रकरणी ओवेसी यांनी भाजपला घेरलं होतं. ओवैसी यांनी या घटनेचा निषेध करत भाजपला चांगलंच सुनावलं होतं. 'राजस्थानमधील राजगढमधील प्राचीन मंदिर पाडणे हा भाजपशासित महापालिका मंडळाचा निषेधार्ह निर्णय आहे. आम्ही सर्व धर्मांच्या धर्म स्वातंत्र्यावर विश्वास ठेवतो हे गंभीर उल्लंघन आहे. सर्व प्रार्थनास्थळांवर झालेल्या हल्ल्याबद्दल भाजप-आरएसएस माफी मागतील' असं ओवैसी यांनी ट्विटमध्ये म्हटलं होतं.

Edited By - Satish Daud