Bihar News : बिहारच्या औरंगाबादेत मोठी दुर्घटना; सिलेंडरच्या स्फोटात ३० जण होरपळले

औरंगाबाद : बिहारच्या औरंगाबाद (Aurangabad) शहरात एक भंयकर घटना घडली. छट पुजेचा प्रसाद बनवत असताना अचानक गॅस सिलिंडरचा भीषण स्फोट झाला. या स्फोटात ३० हून अधिकजण होरपळले असल्याची माहिती आहे. सर्व जखमींना तातडीने सदर रुग्णालयात दाखल करण्यात आले असून, त्यांच्यावर उपचार सुरू आहेत. सध्या जखमींची प्रकृती धोक्याबाहेर असल्याचे सांगण्यात येत आहे.

नेमकं काय घडलं?

प्राप्त माहितीनुसार, बिहारच्या औरंगाबाद शहरातील शहागंज परिसरातील एका घरात छट पुजेचा प्रसाद बनवण्याचे काम सुरू होते. महिला प्रसाद बनवत असताना अचानक सिलेंडरमधून गॅस (LPG Cylinder) गळती होऊन आग लागली. आगीची माहिती मिळताच परिसरातील काही लोकांनी आग विझवण्यासाठी धाव घेतली.

घटनेची माहिती मिळताच, पोलिसही घटनास्थळी दाखल झाले. पोलिस कर्मचाऱ्यांनी आग विझवण्याचे प्रयत्न सुरू केले. मात्र यादरम्यान सिलिंडरचा स्फोट झाला, या स्फोटात 30 हून अधिकजण होरपळले असल्याची माहिती आहे. यामध्ये काही पोलीस कर्मचाऱ्यांचा देखील समावेश आहे.

दरम्यान, स्फोटातील जखमींवर सध्या सदर रुग्णालयात उपचार सुरू आहेत. मात्र, यापैकी १० जणांना चांगल्या उपचारांसाठी रेफर करण्यात आले आहे. डॉक्टरांच्या म्हणण्यानुसार या सर्वांवर प्राथमिक उपचार करण्यात आले असून त्यांची प्रकृती सामान्य आहे. त्याचबरोबर अशा प्रसंगी सावध राहण्याचे आवाहन जिल्हा प्रशासनाने केले असून, सावधगिरी बाळगल्यास जाळपोळीचा धोका टाळता येईल, असे सांगितले आहे.

Edited By - Satish Daud