Badlapur Accident VIDEO : बदलापूर अपघाताचा भयावह व्हिडिओ; भरधाव कारनं महिलेला उडवलं

मयुरेश कडव, साम प्रतिनिधी

बदलापूर : मुंबई आणि पुण्यातील हिट अँड रनच्या घटना ताज्या असतानाच, आता बदलापूरमध्येही भीषण आणि तितकाच भयावह अपघात झाला आहे. बदलापूर पूर्वेकडे आज, सोमवारी पहाटेच्या सुमारास भरधाव कारनं एका पादचारी महिलेला उडवलं. यात जखमी झालेल्या महिलेचा मृत्यू झाला आहे.

आधी पुणे नंतर मुंबई आता संपूर्ण राज्यात हिट अँड रनच्या घटना वाढताना दिसत आहेत. त्यातच आता बदलापूर येथील खरवईमधील पनवेलकर भूमी कॉम्प्लेक्सजवळ आज पहाटेच्या सुमारास भीषण अपघात झाला. बदलापूर येथे घडलेल्या भीषण दुर्घटनेत एका महिलेचा जागीच मृत्यू झाला आहे. भरधाव कारने धडक दिल्याने हा अपघात घडला आणि या महिलेला जीव गमवावा लागला. मथुरा रामा इरले असं अपघातात मृत्युमुखी पडलेल्या महिलेचे नाव आहे. ही संपूर्ण घटना सीसीटीव्ही कॅमेऱ्यात कैद झाली असून पोलिसांनी वाहनचालकाविरोधात गुन्हा दाखल केला असून, त्याला अटक केली आहे.

अपघाताची माहिती मिळताच बदलापूर पोलीस घटनास्थळी दाखल झाले. पोलिसांनी सीसीटीव्ही फुटेजच्या आधारे आरोपी वाहनचालकाला ताब्यात घेतले आहे. या प्रकरणी गुन्हा दाखल करण्यात आला असून पुढील तपास सुरू आहे. तसेच आपघातामुळे परिसरात हळहळ व्यक्त होत असून, रहदारीच्या नियमांचे पालन करण्याचे आवाहन पोलीस प्रशासनाने केले आहे.

व्हिडिओमध्ये नेमकं काय?

या व्हिडिओमध्ये स्पष्टपणे दिसून येते की वाहनचालक हा अत्यंत वेगात कार घेऊन जात होता. महिला ही पायी जात होती. तेवढ्यात एक भरधाव कार तिच्यामागून आली. तिला जोरदार धडक दिली. धडक बसताच महिला जोरात जमिनीवर आपटली. तसेच काही अंतरावर फरफटत गेली. हे दृश्य अत्यंत भयावह आहे.