Western Railway Sixth Line: पश्चिम रेल्वे प्रवाशांसाठी खुशखबर; गर्दी टळणार, वेळ वाचणार!

Western Railway: पश्चिम रेल्वेने प्रवास करणाऱ्या प्रवाश्यांसाठी एक खास बातमी आहे. कांदिवली ते बोरीवली दरम्यानच्या नव्या रेल्वे कॉरिडॉरसाठी खाजगी जागा उपलब्ध झाली आहे. हे महत्त्वपूर्ण भूसंपादन झाल्याने पश्चिम रेल्वेच्या उपनगरीय नेटवर्कमध्ये अपग्रेड होणार आहे. हा टप्पा रेल्वेच्या नेटवर्कच्या विस्ताराच्या दिशेने एक महत्त्वपूर्ण पाऊल आहे.

दररोज असंख्य प्रवासी पश्चिम रेल्वेने प्रवास करतात. प्रवाश्यांची संख्या दिवसेंदिवस वाढत आहे. तेव्हा गर्दीचे नियोजन करण्यासाठी रेल्वे प्रशासन नेहमी प्रयत्न करत असते. गर्दीचा प्रश्न मार्गी लावण्याच्या दृष्टीने प्रशासनाने रेल्वे नेटवर्क वाढवण्याचा निर्णय घेतला होता. त्याअंतर्गत पश्चिम रेल्वेच्या सहाव्या लाईनचे काम सुरु करण्यात आले. सध्या पाचवी लाईन कार्यरत असून सहाव्या लाईनवर टप्प्याटप्प्याने काम होत आहे.

सहाव्या लाईनसाठी बोरीवलीतील खाजगी जमीन लागणार होती. पण काही कायदेशीर गोष्टींमुळे ट्रॅकचे काम प्रलंबित होते. आता कायदेशीर तरतूदी पूर्ण झाल्या असून बोरीवलीतील ४२४.५ चौरस मीटर जमीन रेल्वे प्रशासनाला मिळाली आहे. या जमिनीवर लाईनचे काम सुरु झाल्यावर मार्च २०२५ पर्यंत सहावी लाईन प्रवासासाठी खुली होईल अशी माहिती रेल्वे अधिकाऱ्याने माध्यमांना दिली आहे.

रेल्वे अधिकाऱ्याने दिलेल्या माहितीनुसार, नोव्हेंबर २०२३ मध्ये वांद्रे टर्मिनल्स ते गोरेगाव या ९ किलोमीटरचा टप्पा आणि ऑक्टोबर २०२४ मध्ये गोरेगाव ते कांदिवला हा ४.५ किलोमीटरचा टप्पा पूर्ण झाला होता. भूसंपादनामुळे पुढील कामाला सुरुवात होणार आहे. सध्या पूल क्रमांक ६१ चे बांधकाम सुरु आहे. त्या पुलावर प्री-स्ट्रेस काँक्रीट स्लॅब जोडून त्यामध्ये सुधारणा करण्यात येणार आहे. रेल्वे मार्ग सुरु असल्याने रात्रीच्या वेळेस तेथील जमिनीचे काम केले जात आहे.

पश्चिम रेल्वेची सहावी लाईन सुरु झाल्यास रेल्वेच्या क्षमतेमध्ये लक्षणीय वाढ होणार आहे. रेल्वेचे नेटवर्क सुधारल्याने मुंबईकरांना अधिक सुखद प्रवास करणे शक्य होणार आहे.