Water Shortage In Shahapur : शहापूर तालुक्यात विहिर अधिग्रहणचे प्रस्ताव पडलेत धुळखात, महिलांची पाण्यासाठी भटकंती

- फैयाज शेख

Shahapur News :

ठाणे जिल्ह्यातील मुख्यमंत्र्याच्या कर्मभुमितील शहापुर तालूक्यात पावसाने रजा घेऊन दोन महिने झाले नाही ताेच या तालुक्यातील अनेक गावांत वाडी वस्तीमधील ग्रामस्थांना पाणी टंचाईच्या झळा बसू लागल्या आहेत. या तालुक्यातील 30 टक्के गावांत टँकरने पाणी पुरवठा सुरू करण्यात आला आहे. (Maharashtra News)

शहापुर तालुक्यातील अनेक गावांना भीषण पाणी टंचाईचा सामना करावा लागत असल्याचे विदारक चित्र पाहण्यास मिळत आहे. या तालुक्यातील गावागावांत दरवर्षी पाचवीला पुजलेली पिण्याच्या पाण्याच्या टंचाईची झळ यावर्षी बसू लागली आहे.

या तालुक्यातील 30 टक्के गावांत टँकरने पाणी पुरवठा सुरू करण्यात आला आहे. काही गावांत विहिरीचे अधिग्रहण करण्याचा प्रस्ताव धुळखात पडला आहे. फुगाळा, आघणवाडी गावांत दसऱ्यापासून पाणी टंचाईच्या झळा सुरु झाल्या आहेत. या गावांत असलेल्या 2 विहिरींनी तळ ठोकला आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

स्थानिक गावकऱ्यांनी गावापासून दोन किलोमीटर दुरवर एका डोंगराच्या कपारी खाली पाझर सुरु असलेल्या डबक्यातून पाणी गोळा करण्याचे काम सुरु केले आहे. गावातील महिला ,वृद्ध, लहान मुली 2 किलोमीटर दरी खोऱ्यातून पायी प्रवास करीत सकाळी सहापासुन् या डबक्याच्या ठिकाणी पाण्यासाठी रांगा लावतात. एक हंडा कळशी भरण्यासाठी अर्धा तास लागत असल्याने महिला भगिनींना तारे वरची कसरत करावी लागत आहे.

Edited By : Siddharth Latkar