Shocking : विरार हादरलं! बंद खोलीत आढळले ३ भावंडांचे मृतदेह; पोलिसांनी दरवाजा उघडला अन्...

मनोज तांबे, मुंबई

विरारमधील ग्लोबल सिटी परिसरात बहिण-भावांचे मृतदेह आढळल्याने परिसरात खळबळ उडाली आहे. ग्लोबल सिटी येथील के-३ अव्हेन्यू इमारतीतील भाड्याच्या घरात हे मृतदेह आढळून आले. बंद घरातून दुर्गंधी येऊ लागल्याने हा प्रकार उघडकीस आला. या घटनेची माहिती मिळताच बोळींज पोलिसांनी घटनास्थळी धाव घेत मृतदेह ताब्यात घेतले असून, मृत्यूमागील नेमके कारण शोधण्यासाठी तपास सुरू केला आहे.

मिळालेल्या प्राथमिक माहितीनुसार, संबंधित कुटुंब विरारमधील ग्लोबल सिटी परिसरातील के-३ अव्हेन्यू इमारतीत भाड्याने राहत होते. घर अनेक वेळ बंद असल्याचे आणि त्यातून दुर्गंधी येत असल्याचे स्थानिकांच्या लक्षात आले. त्यामुळे स्थानिकांनी तातडीने बोळींज पोलिसांना याबाबत माहिती दिली. पोलिसांनी घटनास्थळी पोहोचून घराची पाहणी केली असता, घरात बहिण-भावांचे मृतदेह आढळून आले.

या घटनेतील एका भावाचे नाव कुमार मेहता असल्याचे सांगितले जात आहे. प्राथमिक माहितीनुसार, एका भावाला गंभीर आजार होता. त्याच्या उपचारासाठी आर्थिक अडचणी निर्माण झाल्याची माहिती समोर येत आहे. या परिस्थितीच्या पार्श्वभूमीवर तिघांनी विषप्राशन केल्याचा प्राथमिक संशय व्यक्त केला जात आहे.

दरम्यान, मृत्यूचे नेमके कारण अद्याप स्पष्ट झालेले नाही. पोलिसांकडून घटनास्थळाची पाहणी करण्यात आली असून, फॉरेन्सिक पथकाच्या मदतीने पुरावे गोळा करण्याची प्रक्रिया सुरू आहे. या प्रकरणाचा सर्व बाजूंनी तपास केला जात असून, शवविच्छेदन अहवाल आणि फॉरेन्सिक तपासातून मृत्यूचे कारण स्पष्ट होण्याची शक्यता आहे. पोलिसांच्या तपासानंतरच या घटनेमागील नेमकी परिस्थिती समोर येणार आहे.