Virar Crime: कामावरुन घरी परतलीच नाही... विहिरीत आढळला मृतदेह; ३८ वर्षीय महिलेसोबत काय घडलं?

Virar Crime News: विरार पूर्वेकडील शिरसाड येथील एका महिलेचा मृतदेह आढळून आल्याने एकच खळबळ उडाली आहे. याबाबत घातपाताचा संशय व्यक्त केला जात आहे. या घटनेची माहिती मिळताच पोलिसांनी तात्काळ धाव घेत मृतदेह ताब्यात घेतला आहे. ही हत्या की आत्महत्या याबाबत आता मांडवी पोलिस अधिक तपास करत आहेत.. (Crime News IN Marathi)

याबाबत समोर आलेल्या माहितीनुसार, शिरसाड येथील राऊत पाडा येथील जागृती केसरीनाथ राऊत ही 38 वयाची महिला कणेर फाटा येथील कंपनीत कामाला शुक्रवारी गेली होती. नेहमी ती सायंकाळी सहा साडेसहा दरम्यान घरी येत होती. मात्र वेळेवर न आल्याने तिचा शोध सुरू केला.

नातेवाईकांना फोन केले, मात्र काहीही माहिती न मिळाल्याने ती येणाऱ्या रस्त्यावर तिचा शोध घेण्यात आला. यावेळी राऊत पाडा येथील जवळच असलेल्या विहिरीत रात्री अकराच्या सुमारास मृतदेह आढळून आला. या घटनेमुळे राऊत कुटुंबाला धक्का बसला आहे. (Crime News)

कुटुंबातील सदस्यांनी दिलेल्या माहितीनुसार विहिरीजवळ जेवणाचा डब्बा, चप्पल, बॅग मिळून आले. मात्र मोबाईल मिळून आला नाही. मृत महिला जागृती हिला दोन मुली असून एक बारावी व एक सातवीमध्ये शिक्षण घेत आहेत, तर पतीही कंपनीत कामाला आहेत. या घटनेची माहिती मिळताच मांडवी पोलीसांनी घटनास्थळी दाखल होत घटनेचा अधिक तपास पोलीस करीत आहेत. (Latest Marathi News)