Vikroli Accident: विक्रोळीत भरधाव कार झाडाला धडकली, २ जीवलग मित्रांचा दुर्दैवी मृत्यू

मयूर राणे, मुंबई

विक्रोळीमध्ये भीषण कार अपघाताची घटना घडली आहे. कार अपघातामध्ये दोघांचा जागीच मृत्यू झाला. पूर्व द्रुतगती मार्गावर विक्रोळीजवळ हा अपघात झाला. चालकाचे कारवरील नियंत्रण सुटल्याने हा अपघात झाला. भरधाव कार झाडावर धडकली. अपघातामध्ये कारमधील दोघांचा मृत्यू झाला. या अपघाताचा तपास विक्रोळ पोलिसांकडून सुरू आहे.

मिळालेल्या माहितीनुसार, पूर्वद्रुतगती मार्गावर विक्रोळीजवळ कारला भीषण अपघात झाला. बुधवारी रात्री १२.३० वाजता प्रवीण हॉटेलसमोर ही घटना घडली. भरधाव कारवरील चालकाचे नियंत्रण सुटले आणि कारने फूट पाथावरील झाडाला जोरदार धडकली. ही धडक इतकी जोरात होती की कार द्रुतगती मार्गावर पलटी झाली. या अपघातामध्ये चालक आणि त्याच्या बाजूला बसलेला एक जण गंभीर जखमी झाले. प्रचंड रक्तस्राव झाल्यामुळे दोघांची प्रकृती गंभीर होती.

अपघाताची माहिती मिळताच विक्रोळी पोलिसांनी घटनास्थळी धाव घेतली. जखमी झालेल्यांना तात्काळ उपचारासाठी राजावाडी रुग्णालयात हलवण्यात आले. पण डॉक्टरांनी उपचारापूर्वीच दोघांनाही मृत घोषीत केले. या अपघातामध्ये कारचा अक्षरश: चुराडा झाला आहे. या अपघातामध्ये सिद्धार्थ ढगे आणि त्याचा मित्र रोहित निकम यांचा दुर्दैवी मृ्त्यू झाला. सिद्धार्थ आणि रोहित हे जीवलग मित्र होते. त्यांच्या मृत्यूमुळे कुटुंबीयांना मोठा धक्का बसला आहे. या घटनेमुळे विक्रोळी परसिरात हळहळ व्यक्त केली जात आहे.