Graduate Election Result: विधानपरिषदेचा पहिला निकाल हाती, कोकण शिक्षक मतदारसंघात भाजपचे ज्ञानेश्वर म्हात्रे विजयी

नवी मुंबई : विधानपरिषदेच्या पदवीधर आणि शिक्षण मतदारसंघ निवडणुकीतील पहिला विजय हाती आला आहे. कोकण शिक्षक मतदारसंघ निवडणुकीत भाजपने बाजी मारली आहे. भाजपचे उमेदवार ज्ञानेश्वर म्हात्रे विजयी झाले आहेत. म्हात्रे यांनी महाविकास आघाडीचे बाळाराम पाटील यांचा पराभव केला आहे.

ज्ञानेश्वर म्हात्रे पहिल्याच फेरीत विजयी झाले आहेत. त्यांना 20648 मतं मिळाली, तर शिक्षकांची 3002 मते अवैध ठरली आहे.

ज्ञानेश्वर म्हात्रे यांच्या विजयानंतर कार्यकर्त्यांनी जल्लोष सुरु केला आहे. गुलाल उधळत सर्व कार्यकर्त्यांनी मतमोजणी केंद्राबाहेर आनंद साजरा केला. यावेळी मतमोजणी केंद्रावर ज्ञानेश्वर म्हात्रे यांचे कुटुंबीय देखील उपस्थित आहेत. (Latest Marathi News)

आपल्या विजयानंतर बोलताना ज्ञानेश्वर म्हात्रे यांनी म्हटलं की, हा विजय सर्व शिक्षकांचा आहे. मला सर्व संघटना आणि पक्षाचा चांगला पाठिंबा असल्याने हा विजय शक्य झाला. शिक्षकांचे सर्व प्रश्न सोडवणार, असं अश्वासनही त्यांनी यावेळी दिलं.

बाळाराम पाटील यांनी पराभवानंतर म्हटलं की, निकाल आलाय तो स्वीकारला आहे. निवडणुकीत मोठ्या प्रमाणावर पैशाचा वापर झाला आहे. पण त्या मुद्द्याकडे न जाता कोकणच्या शिक्षकांनी जो कौल दिला तो मान्य करतो.