Francis Debreto Death: ज्येष्ठ मराठी साहित्यिक फादर फ्रान्सिस दिब्रिटो यांचं निधन, साहित्य विश्वावर शोककळा

अखिल भारतीय मराठी साहित्य संमेलनाचे माजी अध्यक्ष , प्रसिध्द साहित्यिक आणि पर्यावरणवादी चळवळीतील लढवय्ये कार्यकर्ते फादर फ्रान्सिस दिब्रिटो (Francis Debreto) यांचे निधन झाले. फादर फ्रान्सिस दिब्रिटो यांचे गुरूवारी पहाटे ५ वाजता प्रदीर्घ आजाराने निधन झाले. वसई येथील राहत्या घरी त्यांनी अखेरचा श्वास घेतला. ते ८0 वर्षांचे होते. त्यांच्या निधनामुळे मराठी साहित्य विश्व आणि पर्यावरण चळवळीवर शोककळा पसरली आहे.

मिळालेल्या माहितीनुसार, अखिल भारतीय मराठी साहित्य संमेलनाचे माजी अध्यक्ष फादर फ्रान्सिस दिब्रिटो हे गेल्या अनेक दिवसांपासून आजारी होते. त्यांच्यावर वसईतल्या जेलाडी येथील निवासस्थानीच उपचार सुरू होते. उपचारादरम्यानच गुरुवारी पहाटे त्यांचे निधन झाले. दुपारी साडेतीन वाजेपर्यंत त्यांचे पार्थिव अंत्यदर्शनासाठी राहत्या घरी ठेवण्यात येणार आहे. त्यानंतर ४ वाजेपासून विरारच्या नंदाखाल येथील होली स्पिरिट चर्च येथे देखील त्यांचे पार्थिव अंत्यदर्शनासाठी ठेवण्यात येणार आहे. याच चर्चमध्ये संध्याकाळी ६ वाजता त्यांच्या पार्थिवावर अंत्यसंस्कार करण्यात येणार आहेत.

अखिल भारतीय मराठी साहित्य संमेलनाचे माजी अध्यक्ष, ज्येष्ठ साहित्यिक, सामाजिक कार्यकर्ते फादर फ्रान्सिस दिब्रिटो यांनी मराठी साहित्य, सामाजिक आणि पर्यावरण चळवळीत मोलाचे योगदान दिले आहे. भारतीय संस्कृती आणि संत साहित्याचा गाढा अभ्यास असलेल्या फादर फ्रान्सिस दिब्रिटो यांनी समाजात एकता, बंधुता, शांतता, सामाजिक सलोखा रहावा यासाठी व्याख्यानांच्या माध्यमातून समाजप्रबोधनाचे काम केले. 'सुवार्ता' साप्ताहिकाच्या माध्यमातून त्यांनी पर्यावरण, नागरी, सामाजिक प्रश्न प्रभावीपणे हाताळले. हरित वसई चळवळीसाठी त्यांनी काम केले. फादर फ्रान्सिस दिब्रिटो हे १९८३ ते २००७ या काळात सुवार्ताचे मुख्य संपादक होते.

फ्रान्सिस दिब्रिटो यांनी वसईतल्या नंदाखाल येथील संत जोसेफ मराठी हायस्कूलमध्ये शिक्षण घेतलं होतं. त्यांनी पुणे विद्यापीठातून समाजशास्त्रात बी.ए आणि धर्मशास्त्रात एम.ए ची पदवी घेतली होती. १९७२ मध्ये त्यांनी कॅथलिक धर्मगुरुपदाची दीक्षा घेतली. फादर फ्रान्सिस दिब्रिटो हे प्रसिद्ध ख्रिस्ती धर्मगुरू होते. ख्रिश्चन धर्मासाठी त्यांनी खूप काम केले. यासोबतच त्यांनी समाजकार्य देखील केले. पर्यावरणाचे रक्षणकर्ते अशी देखील त्यांची ओळख होती. त्यांनी पालघर जिल्ह्यातील वसई तालुका आणि आसपासच्या परिसरात पर्यावरणाशी संबंधित कामासाठी मोलाचे योगदान दिले.