Ulhas River Flood: उल्हास नदीने धोक्याची पातळी ओलांडली, बदलापुरला पुराचा धोका; कर्जतकडे जाणारा महामार्ग पाण्याखाली

ठाणे, रायगड आणि पुणे जिल्ह्यात मागील २४ तासांपासून पडणाऱ्या मुसळधार पावसामुळे उल्हास नदीने धोक्याची पातळी गाठली आहे. उल्हास नदी पात्राबाहेर आली असून नदीचे पाणी बदलापूर शहरामध्ये शिरले आहे. बदलापूरमधील अनेक परिसरात गुडघाभर पाणी साचले आहे. त्यामुळे नागरिकांचे हाल होत आहे. उल्हास नदीमुळे बदलापुरवरून कर्जतकडे जाणारा राज्य महामार्ग बंद झाला आहे.

उल्हास नदीचे पाणी बदलापुरवरून कर्जतकडे जाणाऱ्या राज्य महामार्गावर आल्यामुळे हा महामार्ग बंद झाला आहे. चामटोली गावाजवळ महामार्गावर मोठ्या प्रमाणात पाणी साचले आहे. बदलापूर आणि वांगणी दरम्यान चामटोली गावाजवळ रस्त्यावर मोठ्या प्रमाणात पाणी साचलं असून त्यामुळे पोलिसांनी खबरदारीचा उपाय म्हणून कर्जतकडे जाणारा हा राज्य महामार्ग बंद केला आहे.

काही वर्षांपूर्वी याच चामटोली गावाजवळ उल्हास नदीचं पाणी रेल्वे रुळावर आल्यामुळे महालक्ष्मी एक्सप्रेस पुराच्या पाण्यात अडकून पडली होती. आता पुन्हा एकदा चामटोली गावात पुराचं पाणी रस्त्यावर आल्यामुळे त्या भयावह पुराच्या आठवणी जाग्या झाल्या आहेत. अशातच रायगडच्या कर्जत तालुक्यातील नेरळ- कळंब मार्गावरील दहिवली येथे पूल पाण्याखाली गेला आहे. त्यामुळे ३० ते ४० गावांचा संपर्क तुटला आहे.

उल्हास नदीने धोक्याची पातळी ओलांडल्याने बदलापूरमधील सखल भागात जमा होऊ लागल्याने बदलापूर नगरपालिकेतर्फे सखल भागात राहणाऱ्या नागरिकांना सुरक्षित ठिकाणी जाण्यासाठी आवाहन करण्यात येत आहे. दरम्यान, उल्हास नदीने इशारा पातळी ओलांडली आहे. कल्याण - नगर मार्गावरील रायते पुलाला नदीचे पाणी लागले आहे. पावसाचा जोर कायम राहिल्यास उल्हासनदीच्या पाण्यात वाढ होण्याची शक्यता आहे. उल्हास नदीची पातळी वाढल्यास कल्याण नगर मार्गावरील रायते पुलावरील वाहतूक बंद होण्याची शक्यता आहे.