BMC Election : उबाठा - मनसे युतीत धुसफूस; राज ठाकरेंच्या उमेदवाराच्या प्रचाराला ठाकरेसेनेचे पाठबळ नाही

संजय गडदे, मुंबई

मुंबई महानगरपालिकेसह ठाणे, नाशिक, पुणे, कल्याण-डोंबिवली आदी अनेक महानगरपालिकांच्या निवडणुकांसाठी शिवसेना (ठाकरे गट) आणि मनसे यांच्यात युती झाली आहे. या युतीअंतर्गत मुंबई महानगरपालिकेत मनसेला ५२ जागा देण्यात आल्या असून, या निर्णयामुळे मनसेमधील अनेक इच्छुक पदाधिकाऱ्यांना उमेदवारी मिळू शकली नाही. परिणामी काही पदाधिकारी नाराज होऊन मनसेला रामराम ठोकत असल्याचे चित्रही समोर आले आहे.

दरम्यान, अंधेरी पश्चिमेकडील प्रभाग क्रमांक ६७ मध्ये मनसेकडून मनसे विद्यार्थी सेनेचे उपाध्यक्ष कुशल धुरी यांना उमेदवारी देण्यात आली आहे. उमेदवारी जाहीर होताच कुशल धुरी यांनी प्रचाराला जोरदार सुरुवात केली असून, घराघरांत जाऊन मतदारांशी संपर्क साधला जात आहे. मात्र, या प्रचारात स्थानिक शिवसेना (ठाकरे गट) पदाधिकाऱ्यांकडून अपेक्षित साथ मिळत नसल्याने कुशल धुरी प्रचारात एकाकी पडल्याचे चित्र सध्या दिसून येत आहे.

या पार्श्वभूमीवर उमेदवार कुशल धुरी यांनी उघडपणे नाराजी व्यक्त केली असून, स्थानिक शिवसेना पदाधिकाऱ्यांच्या निष्क्रियतेबाबत त्यांनी मनसे अध्यक्ष राज ठाकरे यांच्याकडे तक्रार केल्याची माहिती आहे. मुंबईत शिवसेना (ठाकरे गट), मनसे आणि राष्ट्रवादी काँग्रेस (शरद पवार गट) यांची महाआघाडी असतानाही प्रत्यक्ष मैदानात शिवसेनेचे स्थानिक पदाधिकारी प्रचारात उतरलेले दिसत नसल्याने मनसे कार्यकर्त्यांमध्ये असंतोष पसरला आहे.

या असंतोषाला आणखी धार देणारी बाब म्हणजे, याच मतदारसंघातून शिवसेना (ठाकरे गट) चे शाखाप्रमुख दीपक सणस यांनी अपक्ष उमेदवारी दाखल केली आहे. त्यामुळे राजकीय समीकरणे अधिकच गुंतागुंतीची झाली असून, काही शिवसेना पदाधिकारी पडद्यामागून दीपक सणस यांच्या समर्थनार्थ प्रचार करत असल्याचे चित्र मतदारसंघात पाहायला मिळत आहे. यामुळे महाआघाडीच्या उमेदवाराला प्रत्यक्ष नुकसान होत असल्याचा आरोप मनसेकडून केला जात आहे.

मात्र, दुसरीकडे मनसैनिक, शिवसैनिक तसेच राष्ट्रवादी काँग्रेस (शरद पवार गट) पक्षाचे अनेक कार्यकर्ते प्रचारात सक्रियपणे सहभागी होत असून, मतदारांकडूनही उत्स्फूर्त प्रतिसाद मिळत असल्याचा दावा कुशल धुरी यांनी केला आहे. “महाआघाडीच्या कार्यकर्त्यांच्या मेहनतीमुळे वातावरण सकारात्मक आहे. १५ तारखेला मोठ्या प्रमाणावर मतदान होईल आणि १६ तारखेला विजय आमचाच होईल. मुंबईचा महापौर देखील ठाकरे बंधूंच्या युतीचाच होईल,” असा ठाम विश्वास कुशल धुरी यांनी व्यक्त केला आहे.

एकीकडे महाआघाडीची घोषणा आणि दुसरीकडे स्थानिक पातळीवरील बंडखोरी, अंतर्गत नाराजी व प्रचारातील दुटप्पी भूमिका यामुळे अंधेरी पश्चिमेकडील प्रभाग क्रमांक ६७ मधील राजकीय वातावरण चांगलेच तापले असून, येत्या काळात वरिष्ठ नेते या वादावर काय भूमिका घेतात, याकडे सर्वांचे लक्ष लागले आहे.