उद्धव ठाकरेंना मोठा धक्का; कल्याण-डोंबिवलीतील बडा नेता भाजपमध्ये जाणार, राजकीय वर्तुळात खळबळ

संघर्ष गांगुर्डे, साम टीव्ही

कल्याण–डोंबिवली महानगरपालिका निवडणुकीच्या पार्श्वभूमीवर ठाकरे गटाला मोठा धक्का बसला आहे. ठाकरे गटाचे जिल्हाप्रमुख दीपेश म्हात्रे यांनी पक्षाला रामराम ठोकत लवकरच भाजपात प्रवेश करणार असल्याची माहिती समोर आली आहे. या हालचालीमुळे स्थानिक राजकारणात मोठा भूकंप झाल्याची चर्चा सुरु आहे.

डोंबिवलीत उद्या रविवारी त्यांच्या पक्ष प्रवेशाचा कार्यक्रम होणार आहे. या कार्यक्रमाला भाजपचे वरिष्ठ नेते आणि पदाधिकारी उपस्थित राहणार आहेत. म्हात्रे यांच्या प्रवेशामुळे भाजपला कल्याण-डोंबिवली परिसरात संघटनात्मक बळ मिळणार आहे. तर ठाकरे गटात मोठी पोकळी निर्माण होणार आहे.

निवडणुकीच्या तोंडावर झालेला हा राजकीय फेरबदल ठाकरे गटासाठी धक्का ठरणार आहे. यातून पक्षातील अंतर्गत नाराजीचे संकेत स्पष्ट दिसत आहेत. केडीएमसी निवडणुकीच्या तयारीत असलेल्या दोन्ही गटांमध्ये या घडामोडीनंतर रणनीतीत मोठे बदल होण्याची शक्यता व्यक्त केली जात आहे. राजकीय निरीक्षकांच्या मते, म्हात्रे यांचा भाजपात प्रवेश हा केवळ व्यक्तीगत निर्णय आहे. मात्र, आगामी महानगरपालिका निवडणुकीतील गठबंधन समीकरणांवर परिणाम करणारा टप्पा ठरू शकतो.

कोण आहेत दीपेश म्हात्रे?

ठाकरे गटाने दीपेश म्हात्रे यांना कल्याण ग्रामीण, डोंबिवली आणि कळवा-मुंब्रा विधासभा क्षेत्र जिल्हाप्रमुखपदाची जबाबादारी सोपवली होती. दीपेश म्हात्रे हे कल्याण-डोंबिवलीतील जुने नगरसेवक म्हणून ओळखले जातात. कल्याण-डोंबिवली महानगरपालिकेत 2009 पासून नगरसेवक आहेत. त्यांनी पालिकेच्या स्थायी समिती सभापतीपदाची जबाबदारी 2 वेळा सांभाळली आहे.

त्यांच्या कुटुंबाचाही पालिका क्षेत्रातील राजकारणात दबदबा आहे. त्यांचे वडील पुंडलिक म्हात्रे यांनी महापौरपद भूषवलं होतं. तर त्यांच्या कुटुंबात आई आणि बंधू देखील नगरसेवक होते. त्यांचा भाजप प्रवेश हा ठाकरे गटासाठी खूप मोठा धक्का आहे. दीपेश म्हात्रे हे शिंदे गटात जाणार अशी चर्चा होती. परंतु ते आता भाजपमध्ये प्रवेश करणाार आहेत. त्यामुळे हा शिंदेंच्या शिवसेनेसाठीही धक्का मानला जात आहे.