खेळता- खेळता रस्त्यावर खोदलेल्या खड्ड्यात पडून, २ चिमुरड्यांचा मृत्यू

मुंबई : उद्यानाच्या सुशोभीकरण कामाकरिता कंत्राटदाराने खोदलेल्या खड्डयाच्या पाण्याचा पडून दोन मुलांचा मृत्यू झाल्याची घटना अँटॉप हिलच्या सीजीएस कॉलनीजवळ घडली आहे. यशकुमार चंद्रवंशी (वय- ११) आणि शिवम जैस्वाल अशी मृत मुलांची नावे आहेत. याप्रकरणी कंत्राटदारावर गुन्हा दाखल करण्याची प्रक्रिया रात्री उशिरापर्यंत सुरु होती.

हे देखील पहा-

सीजीएस कॉलनी मधील सेक्टर ७ मध्ये उद्यान आहे. या उद्यानाच्या सुशोभिकरणाचे काम कंत्राटदाराला देण्यात आले आहे. कंत्राटदाराने उद्यानात मोठा खड्डा खणला असून तो उघडा असल्यामुळे पाण्याने भरला आहे. काम अर्धवट असताना देखील उद्यान सुरु असल्यामुळे परिसरातील लहान लहान मुले खेळण्याकरिता या उद्यानात जात असतात.

सोमवारी अनेक मुले खेळत असताना यशकुमार आणि शिवम संध्याकाळी ५ वाजेच्या सुमारास या खड्ड्यात पडले आहेत. पोहता येत नसल्यामुळे त्यांच्या नाका तोंडात पाणी गेले. इतर मुलांच्या हा प्रकार लक्षात आल्यावर त्यांनी आजूबाजूला असलेल्या लोकांना सांगितले. त्यांनी पोलिस आणि अग्निशमन दलाच्या जवानांना प्राचारण करण्यात आले. दोन्ही मुलांना बाहेर काढून जवळच्या रुग्णालयात नेण्यात आले होते.

मात्र, दाखल करण्या अगोदरच त्यांना मृत घोषित करण्यात आले आहे. यशकुमार आणि शिवम याच्या मृत्यूने परिसरात हळहळ व्यक्त होत असताना कंत्राटदाराविरुद्ध लोकांचा संताप आहे. निष्काळजीपणा करणाऱ्या कंत्राटदाराविरुद्ध गुन्हा दाखल करण्याचे काम पोलिसांमार्फत रात्री उशिरापर्यंत सुरु होते.

Edited By- Digambar Jadhav