Thane Water Supply : ठाण्यात काही दिवस अनियमित पाणीपुरवठा, कारण काय?

ठाणे शहरातील नागरिकांना पुन्हा एकदा अनियमित पाणीपुरवठ्याचा सामना करावा लागणार आहे. मागील तीन दिवसांपासून भातसा धरण क्षेत्रात मुसळधार पाऊस होत असल्याने पाणीपुरवठ्याच्या कामकाजावर गंभीर परिणाम झाला आहे. सलग अतिवृष्टीमुळे पिसे पंपिंग स्टेशनच्या नदीपात्रात मोठ्या प्रमाणावर गाळ, झाडांच्या फांद्या, कचरा साचला असून नदीपात्रात पूरसदृश्य परिस्थिती निर्माण झाली आहे. यामुळे पंपिंग स्टेशनमध्ये पाणी शिरले असून पंपिंगची क्षमता मोठ्या प्रमाणात घटली आहे. परिणामी ठाणे शहराकडे जाणारा पाणीपुरवठा तब्बल २५ टक्क्यांनी कमी झाला आहे.

महापालिकेच्या अधिकाऱ्यांनी दिलेल्या माहितीनुसार, पंपाच्या स्टेनरमध्ये अडकलेला गाळ व कचरा काढण्याचे काम युद्धपातळीवर सुरू आहे. परंतु नदीपात्रातील पाण्याच्या गढूळपणामुळे शुद्धीकरणाच्या प्रक्रियेतही अडचणी निर्माण होत आहेत. या संपूर्ण परिस्थितीचा परिणाम थेट नागरिकांच्या दैनंदिन जीवनावर होत असून, पुढील काही दिवस ठाणे शहरात अपुऱ्या प्रमाणात व अनियमित पाणीपुरवठा होण्याची शक्यता वर्तवली जात आहे.

दरम्यान, महापालिकेने नागरिकांना आवाहन केले आहे की, या काळात पाण्याचा वापर जपून करावा, पाणी साठवून ठेवावे आणि पिण्यापूर्वी नक्की उकळून घ्यावे. कारण पाण्याच्या गढूळपणामुळे आरोग्यावर विपरीत परिणाम होऊ शकतो. पावसाळ्यात अशा घटना घडत असल्याने नागरिकांना अतिरिक्त काळजी घेण्याचे आवाहन करण्यात आले आहे.

महापालिकेने नागरिकांना धीर धरावा, घाबरून जाऊ नये आणि पाणीपुरवठ्यातील अडचणी तात्पुरत्या स्वरूपाच्या असल्याचे स्पष्ट केले आहे. मात्र, शहरातील वाढती लोकसंख्या आणि दरवर्षी पावसाळ्यात निर्माण होणाऱ्या अशा समस्यांमुळे ठाणेकरांच्या पाणीप्रश्नावर कायमस्वरूपी तोडगा काढण्याची मागणीही पुन्हा एकदा जोर धरत आहे.