Thane : मोठी बातमी! मंगळवारी पावसाचा रेड अलर्ट, ठाण्यातील सर्व शाळांना सुट्टी

Thane : हवामान विभागाने पुढील तीन दिवसांसाठी राज्यात अलर्ट जारी केला आहे. मुंबई, पालघर, ठाणे या जिल्ह्यांमध्ये ऑरेंज अलर्ट; पुणे, सातारा, कोल्हापूर या जिल्ह्यांमध्ये रेड अलर्टची घोषणा करण्यात आली आहे. ठाणे जिल्ह्यामध्ये मागील काही तासांपासून मुसळधार पाऊस कोसळत आहे. उद्या होणाऱ्या अतिवृष्टीमुळे ठाणे शहरातील शाळांना प्रशासनाच्या वतीने सुट्टी जाहीर करण्यात आली आहे. नागरिकांच्या सुरक्षेसाठी प्रशासनाने हा निर्णय घेतला आहे. या संदर्भात ठाणे महानगरपालिकेने पत्रक जारी केले आहे.

शिक्षण विभाग, ठाणे महानगरपालिकेने केलेल्या पत्रकामध्ये नमूद केल्याप्रमाणे:-

उपरोक्त विषयान्वये ठाणे शहरात होत असलेल्या अतिवृष्टीमुळे शाळेतील विद्यार्थ्यांची सुरक्षितता लक्षात घेता ठाणे महानगरपालिका परिक्षेत्रातील सर्व व्यवस्थापनाच्या व सर्व माध्यमाच्या पूर्व प्राथमिक/ प्राथमिक/माध्यमिक / उच्च माध्यमिक / खाजगी अनुदानित/ विना अनुदानित शाळांच्या विद्याध्यांना दि.१८/०८/२०२५ व दि.१९/०८/२०२५ रोजी सुट्टी जाहीर करण्यात येत आहे.

आज दुपार सत्रातील बालू असणा-या शाळांतील विद्यार्थ्यांना सुरक्षितपणे घरी सोडण्याची जबाबदारी मुख्याध्यापक व शिक्षकांची राहील. तसेच मुख्याध्यापक व शिक्षक यांनी सर्व विद्यार्थी परी सुखरूप पोहोचल्याची खात्री झाल्याशिवाय आज शाळा मुख्यालय सोडू नये. दि.१८/०८/२०२५ व दि.१९/०८/२०२५ रोजी नियोजित असणारी सर्व प्रशिक्षणे, परोक्षा, इत्यादी नजीकच्या काळामध्ये आपल्या स्तरावर पूर्ण करण्याचे नियोजन करावे. उपरोक्त बाबत सर्व विद्याथ्यांना व पालकांना आपल्या स्तरावरून तात्काळ अवगत करावे.

आठवड्याच्या पहिल्या दिवशी पावसाचा जोर वाढल्याचे पाहायला मिळत आहे. पुढील दोन दिवस असाच मुसळधार पाऊस बरसू शकतो असे संकेत हवामान खात्याने दिले आहेत. बंगालच्या उपसागरामध्ये कमी दाबाचे क्षेत्र निर्माण झाल्याने पूर्व मोसमी पश्चिम द्रोणीय स्थिती निर्माण झाली आहे. या स्थितीमुळे महाराष्ट्रात मुसळधार पाऊस पडत आहे.