Pune Traffic News : 'या' शहरात बांधकामाच्या जड वाहनांना वाहतुकीसाठी रेड झोन तात्पुरता सुरु; जाणून घ्या सविस्तर

वाहतूक कोंडी हा शहरांसाठी नवीन मुद्दा नाही. त्यासाठी शासन नेहमीच प्रयत्नशील असते. मात्र वारंवार वाढणाऱ्या पुणे शहरातील वाहतूक कोंडी आणि नागरिकांना होणारी गैरसोय लक्षात घेऊन पुणे वाहतूक पोलिसांनी बांधकाम क्षेत्राशी संबंधित जड वाहनांच्या प्रवेशासाठी नवीन आदेश जारी केला आहे. हा आदेश शनिवार, रविवार आणि १५ ऑगस्ट या विशिष्ट दिवसांकरिता मर्यादित असणार आहे.

शहरातील काही भागांत सध्या विविध बांधकामे सुरू असल्याने डंपर, हायवा, मिक्सर (आरएमसी) यांसारख्या जड वाहनांची ये-जा अपरिहार्य ठरते. यासाठी शनिवारी म्हणजेच २, ९, १६ आणि २३ ऑगस्ट तसेच शुक्रवारी, १५ ऑगस्ट रोजी सायंकाळी ४ ते रात्री १० या कालावधीवगळता या वाहनांना रेड झोनसह शहरात प्रवेश करण्याची मुभा देण्यात आली आहे. मात्र जेसीबी, रोड रोलर आणि ट्रॅक्टर यांसारख्या वाहनांना पूर्णतः बंदी राहील.

तसेच, रविवारी म्हणजेच ३, १०, १७ आणि २४ ऑगस्ट या दिवशी जड वाहनांना दिवसभर रेड झोनसह शहरातील सर्व भागात प्रवेशाची परवानगी असेल. दरम्यान, शहराच्या मध्यवर्ती आणि गर्दीच्या भागांमध्ये म्हणजेच रेड झोनमध्ये जड वाहनांच्या नियमित प्रवेशावर यापूर्वीप्रमाणेच बंदी राहणार आहे.

हा निर्णय पुणे शहरातील वाहतूक सुरळीत ठेवण्यासाठी आणि नागरिकांच्या सुरक्षिततेच्या दृष्टीने महत्त्वपूर्ण असून, पोलिसांनी वाहनचालकांना आदेशाचे काटेकोर पालन करण्याचे आवाहन केले आहे.