Mumbai : डोकं रिक्षावर आपटलं, फरफडत नेलं; ४ वर्षांच्या चिमुरड्याला अमानुष मारहाण, वसईचा व्हिडिओ पाहून काळजाचा ठोका चुकेल!

मनोज तांबे, वसई

वसईतून माणुसकीला काळिमा फासणारी बातमी समोर आली आहे. एका रिक्षाचालकाने चार वर्षाच्या मुलाला निर्दयीपणे मारहाण केली आहे. धक्कादायक म्हणजे पीडित मुलाच्या वडिलांचं आणि रिक्षाचालकाच भांडण झालं असल्याचे म्हटले जात आहे. या घटनेचा व्हिडिओ सध्या सोशल मीडियावर व्हायरल होत असून याप्रकरणी पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, सदर घटना वसई पश्चिम येथील अनुपमा सोसायटी बाहेर घडली आहे. तसेच आरोपी रिक्षाचालकाने नाव संदीप पवार असे आहे. तर जखमी मुलाचे नाव विघ्नेश असे आहे. संदीप पवार याचा विघ्नेशच्या वडिलांसोबत काही दिवसांपूर्वी क्षुल्लक कारणावरून वाद झाला होता. या वादानंतर संदीप पवारच्या मनात तो राग खदखदत होता. हा राग संदीपने विघ्नेशवर काढला.

विघ्नेश सोसायटी बाहेर खेळत असताना संदीप त्याच्याजवळ गेला. त्यानंतर संदीपने विघ्नेशच डोकं रिक्षाच्या लोखंडी रोडला जोरात आपटलं आणि रस्त्यावर जोरदार फरफडत नेवून कपडे धोपटावे तसे विघ्नेशला रस्त्यावर आपटलं. या घटनेचा सीसीटीव्ही फुटेज देखील समोर आला आहे.

संदीपच्या या निर्दयीपणामुळे विघ्नेश गंभीर जखमी झाला. त्याला तातडीने भाईंदरच्या ओढकार या रुग्णालयात उपचारासाठी नेण्यात आले. सध्या विघ्नेशवर रुग्णालयात उपचार सुरु असून या प्रकरणात संदिपवर पोलीस ठाण्यात गुन्हा दाखल करण्यात आला आहे. दरम्यान या घटनेने परिसरात खळबळ उडाली असून मुलांच्या सुरक्षिततेवर प्रश्नचिन्ह निर्माण झाले आहे.