क्रिकेट खेळताना पत्र्यावर अडकलेला बॉल काढण्यासाठी गेलेल्या एका १२ वर्षीय मुलाचा विजेचा धक्का लागून मृत्यू झाला. ही दुर्दैवी घटना शिरुर तालुक्यातील पाबळ गावात रविवारी सायंकाळी ६ वाजेच्या सुमारास घडली. हर्षल पिंगळे असं मृत मुलाचे नाव आहे. याप्रकरणी शिक्रापूर पोलीस ठाण्यात अकास्मात मृत्यूची नोंद करण्यात आली आहे.
या घटनेनं संपूर्ण गावातून हळहळ व्यक्त होत आहे. पोलिसांनी दिलेल्या माहितीनुसार, रविवारी शाळेला सुट्टी असल्याने हर्षल आणि त्याचे मित्र क्रिकेट खेळत होते. यावेळी बॉल उडून एका घरावरील पत्र्यावर गेला. तेव्हा हर्षल हा बॉल काढण्यासाठी पत्र्यावर चढला.
दरम्यान, बॉल घेऊन खाली उतरत असताना घरावरुन गेलेल्या विजेच्या तारेला त्याचा स्पर्ष झाला. त्यामुळे हर्षलला विजेचा जोरदार धक्का बसला. आरडाओरड होताच गावातील नागरिक धावत आले. त्यांनी लाकडी काठीने हर्षलला बाजूला तातडीने उपचारासाठी जवळील रुग्णालयात दाखल केले.
मात्र, डॉक्टरांनी त्याला मृत घोषित केले. याबाबत हर्षलचे वडील संतोष चंदर पिंगळे यांनी शिक्रापूर पोलीस ठाण्यात खबर दिली.पोलिसांनी आकस्मात मृत्यूची नोंद केली असून पुढील तपास सुरु केला आहे. हर्षल हा अतिशय हुशार आणि देखणा मुलगा होता. त्याच्या अचानक मृत्यूने पिंगळे कुटुंबियांवर दु:खाचा डोंगर कोसळला आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.