मतदानाच्या आदल्यादिवशी EVMमध्ये छेडछाड? शिंदे सेनेच्या आरोपाने राजकीय वर्तुळात खळबळ

राज्यातील काही भागात शनिवारी नगरपरिषद आणि नगरपंचायतीच्या निवडणुकीसाठी मतदान आहे. ठाणे जिल्ह्यातील अंबरनाथ नगरपरिषदेसाठी शनिवारी मतदान होणार आहे. या मतदानसाठी प्रशासनाने जोरदार तयारी सुरू आहे. मतदानासाठी प्रशासकीय कर्मचाऱ्यांची तयारी सुरु असताना अंबरनाथमधील शिंदे सेनेच्या नेत्यांनी गंभीर आरोप केला. शिंदे सेनेच्या पदाधिकाऱ्यांनी अंबरनाथमध्ये EVMमध्ये छेडछाड झाल्याचा आरोप केला आहे. शिंदे सेनेच्या आरोपाने राजकीय वर्तुळात खळबळ उडाली आहे.

अंबरनाथ नगरपरिषदेच्या सार्वत्रिक निवडणुकीसाठी शनिवारी म्हणजे २० डिसेंबर रोजी मतदान होणार आहे. या मतदानासाठी शासकीय कर्मचारी सज्ज झाले आहेत. तर या मतदानाचा कार्यक्रमासाठी १५०० पोलीस अधिकारी आणि कर्मचाऱ्यांचा फौजफाटा तैनात असल्याची माहिती मिळत आहे. या मतदानाच्या आदल्यादिवशी शिंदे गटाने केलेल्या आरोपाने राजकीय वर्तुळात खळबळ उडाली आहे.

अंबरनाथ नगरपरिषदेच्या आदल्या दिवशी म्हणजे आज शुक्रवारी ईव्हीएममध्ये छेडछाड झाल्याचा आरोप शिंदे गटाने केला. शिंदे गटाच्या आरोपाने राजकीय वर्तुळात आरोप-प्रत्यारोप सुरू झाले आहेत. या आरोपानंतर शिंदे गटाचे कार्यकर्ते मतदान केंद्राबाहेर मोठ्या संख्येने जमा झाले. यावेळी शिंदे गटाच्या पदाधिकाऱ्यांची सरकारी कर्मचाऱ्यांसोबत बाचाबाची देखील झाली.

अंबरनाथमध्ये कुठे घडला प्रकार?

पालिकेच्या निवडणुकीदरम्यान पॅनल क्रमांक ५ मध्ये ईव्हीएम मशीनसोबत छेडछाड झाल्याचा आरोप शिवसेनेने केला. अंबरनाथमधील साऊथ इंडियन शाळेत उभारण्यात आलेल्या मतदान केंद्रावर हा प्रकार घडल्याचा दावा करण्यात आलाय.

शिंदे गटाचे उमेदवार शैलेश भोईर यांनी भाजप उमेदवाराचा भाऊ तुषार तेलंगे यांच्यावर ईव्हीएमध्ये छेडछाड केल्याचा आरोप केला. आरोपामुळे निवडणूक प्रक्रियेच्या पारदर्शकतेवर प्रश्नचिन्ह निर्माण झाले आहेत. या प्रकारानंतर ईव्हीएम मशीन तातडीने बदलण्यात याव्यात,अशी मागणी गोपाळ लांडगे यांनी केली. तसेच या प्रकरणाची चौकशी करून योग्य कारवाईची मागणी त्यांनी केली.