कळमनुरीत भाजपचा आमदार वाढेल; प्रज्ञा सातव यांच्या पक्ष प्रवेशानंतर मुटकुळेंचा दावा, शिंदे सेनेचं टेन्शन वाढलं

विधान परिषदेच्या आमदार प्रज्ञा सातव आमदारकीचा राजीनामा देऊन भाजपमध्ये दाखल झालेल्या घटनेला 24 तासांचा कालावधी उलटला नसताना आता प्रज्ञा सातवांच्या पक्षप्रवेश सोहळ्याचे प्रमुख कारण पुढे आले आहे.

भाजपने महाराष्ट्रातील सर्वच विधानसभा मतदारसंघात ताकद आणि सक्षम उमेदवार उभे करायला सुरुवात केली आहे. याला मराठवाड्यातील भाजपचे नेते आणि हिंगोली विधानसभेचे भाजपचे आमदार तानाजी मुटकुळे यांनी सातव यांच्या पक्षप्रवेश सोहळ्यानंतर केलेलं वक्तव्य कारण ठरलं आहे.

प्रज्ञा सातव यांचा काल झालेला पक्षप्रवेश सोहळा हा आमच्यासाठी सुवर्ण अक्षरात लिहिण्यासारखा आहे. आता कळमनुरी विधानसभा मतदारसंघात भाजपचा आमदार वाढणार असल्याचे थेट मुटकुळे म्हणाले आहेत. भाजप आमदाराच्या या दाव्याने आता महायुतीमध्ये खळबळ उडाली आहे.

एकीकडे एकनाथ शिंदे यांच्या नेत्यांची वरिष्ठ पातळीवरती कोंडी करणे सुरू असताना आता स्थानिक पातळीवर देखील भाजपाने शिंदेंच्या आमदारांसमोर सक्षम पर्याय उभे करण्यासाठी यशस्वी प्रयत्न केल्याचं या निमित्ताने पुढे आले आहे. भाजप आमदार तानाजी मुटकुळे यांच्या वक्तव्यानंतर शिंदे सेनेचे आमदार संतोष बांगर काय प्रतिक्रिया देतात, हे पाहावे लागेल.