सारथी संस्थेचा कारनामा! जयंती शिवाजी महाराजांची फोटो लावला संभाजी महाराजांचा

पुणे: 19 फेब्रुवारी रोजी छत्रपती शिवाजी महाराज (Chatrapati shivaji maharaj) यांची 392 वी जयंती आहे. सारथी संस्थेने महाराष्ट्रात 'शिवजयंती' निमित्त Online 'वक्तृत्व स्पर्धा आयोजीत केली आहे. 'शिवजयंती' संदर्भात सारथी संस्थेने आपल्या अधिकृत वेबसाईटवर सदर वक्तृत्व स्पर्धेचे बॕनर (डिझाईन) प्रसिद्ध केले होते. त्यावर छत्रपती शिवाजी महाराजांऐवजी छत्रपती संभाजी महाराजांच्या (Chatrapati sambhaji maharaj) फोटो लावण्यात आला होता. सारथी संस्था अर्थातच राज्य सरकारच्या अखत्यारीत काम करते. यावर राज्यपाल, मुख्यमंत्री, उपमुख्यमंत्री आदींचे फोटो सुद्धा प्रसिद्ध आहेत. असे असताना नजरचुकीने का होईना राज्य सरकारच्या अधिकृत संस्थेकडून (छत्रपती शाहू महाराज यांच्या नावे असणाऱ्या संस्थेकडून) अशी चूक होणे योग्य नाही.

अधिकारी झोपेत काम करतात का...? सारथी संस्थेचे कारभारी कधीच ऐकून घेण्याच्या मानसिकतेचे नाहीत. हेकेखोरपणा करण्याच्या नादात ते स्वतःचा शहाणपणा नेहमी पाजळत असतात आणि त्यांच्या बुद्धीचे उत्तम उदाहरण म्हणजे ही चुकीच्या पद्धतीने शिवाजी महाराजांच्या ऐवजी संभाजी महाराजांचा फोटो छापणे हे कृत्य महाराष्ट्रात तरी चुकीचं आहे अशी संतापजनक टीका संभाजी बिग्रेडने केली आहे. संभाजी ब्रिगेडच्या वतीने या प्रकरणाचा जाहीर निषेध करण्यात आला आहे. सारथी संस्थेने तात्काळ चूक सुधारावी आणि छत्रपती संभाजी महाराजांऐवजी छत्रपती शिवाजी महाराजांचा फोटो प्रसिद्ध करावा अशी मागणी संभाजी बिग्रेडच्या वतीने करण्यात आली आहे.

Edited By: Pravin Dhamale