Maratha Andolan In Kopardi : आरक्षणाबाबत मुख्यमंत्र्यांनी मराठा समाजाच्या तोंडाला पाने पुसू नये : राेहित पवार

- सुशिल थाेरात

Maratha Andolan Latest News : मराठा आरक्षण प्रश्ना बाबत मुख्यमंत्र्यांनी मराठा समाजाच्या तोंडाला पाने पुसू नयेत अशी टीका आमदार रोहित पवार यांनी केली. आमदार पवार यांनी आज काेपर्डीत मराठा आंदाेलक उपाेषणकर्त्यांची भेट घेतली. त्यानंतर त्यांनी साम टीव्हीशी संवाद साधला. (Maharashtra News)

मराठा समाजाला आरक्षण मिळावे या मागणीसाठी गेल्या दोन दिवसांपासून कर्जत तालुक्यातील कोपर्डी गावामध्ये मराठा समाजाच्या वतीने उपोषण सुरू करण्यात आले आहे. आजही उपोषणकर्त्यांंनी निर्भयाला न्याय मिळाला पाहिजे, मराठा समाजावरील अन्याय दूर करा, आरक्षण मिळाले पाहिजे अशा मागण्या केली. आंदाेलकांची कर्जत जामखेडचे आमदार रोहित पवार यांनी भेट घेत त्यांच्याशी चर्चा केली.

आमदार रोहित पवार म्हणाले मराठा समाजाच्या आरक्षणाचा प्रश्न खरंच सोडवायचा असेल तर महाराष्ट्र सरकारने विशेष अधिवेशन बोलवून केंद्र सरकारला मराठा आरक्षणाबाबतचा ठराव पाठवून द्यावा.

केंद्र सरकारने बोलवलेल्या विशेष अधिवेशनामध्ये हा ठराव मंजूर झाल्यानंतर तो कायदा होऊन आरक्षणाचा प्रश्न सुटू शकतो. कुणबी समाजाचे दाखले देण्याबाबतचा निर्णय हा फक्त काही ठराविक लोकांच्या बाबतीत असलेला प्रश्न सोडवू शकतो असेही पवार यांनी नमूद केले. परंतु इतर लोकांचा प्रश्न तसाच प्रलंबित राहील, त्यामुळे मुख्यमंत्र्यांनी मराठा समाजाच्या तोंडाला पाने पुसू नये असा टोलाही आमदार पवार यांनी यावेळी लगावला.

Edited By : Siddharth Latkar