Shaniwar Wada Namaz Row : खासदार मेधाताई तुमच्या बापाचा शनिवारवाडा नाही; राष्ट्रवादीच्या रुपाली ठोंबरे कडाडल्या

सागर आव्हाड, साम टीव्ही

पुणे: शनिवारवाडा येथे काल मुस्लिम महिलांच्या नमाज पठणच्या व्हिडीओ व्हायरल झाल्यानंतर खासदार मेधा कुलकर्णी आणि पतित पावन संघटनेच्या वतीने शनिवार वाडा येथे आक्रमक आंदोलन करण्यात आलं. यावेळी शनिवारवाडा पटांगणात असलेली मजार काढण्यात यावी, अशी मागणी हिंदूत्ववादी संघटनांकडून करण्यात आली. त्यानंतर आज राष्ट्रवादी काँग्रेस पक्षाच्या वतीने याच शनिवारवाड्यात आंदोलन करत पक्षाच्या प्रवक्त्या रूपाली ठोंबरे पाटील यांनी खासदार मेधा कुलकर्णी यांच्यावर जोरदार टीका केली आहे.

शनिवारवाडा येथे आज राष्ट्रवादी काँग्रेस पक्षाच्या वतीने सर्व धर्मीय लोकांच्या उपस्थितीत खासदार मेधा कुलकर्णी यांच्यावर गुन्हा दाखल करण्यात आला. या मागणीसाठी आंदोलन करण्यात आलं. यावेळी राष्ट्रवादी काँग्रेस पक्षाच्या प्रवक्त्या रूपाली ठोंबरे पाटील यांनी मेधा कुलकर्णी यांच्यावर जोरदार टीका केली.

रुपाली ठोंबरे पाटील म्हणाल्या, दिवाळीच्या शुभ मुहूर्तावर काल खासदार मेधा कुलकर्णी यांनी येथे येऊन स्टंटबाजी केली. त्यांनी जे बेकायदेशीर कृत्य केलं. तसेच सणासुदीच्या दिवसांत हिंदू-मुस्लिम समाजात तेढ निर्माण करण्याचा प्रयत्न केला म्हणून त्यांच्यावर गुन्हा दाखल करण्यात यावा, या मागणीसाठी आज आम्ही आंदोलन केलं.

शनिवारवाडा मराठा सम्राट पेशवे यांचं मुख्यालय होतं. त्यातील मजार १९३६ मध्ये पुरातत्व विभागाने नोंद केलेली आहे. पुण्यात अनेक वर्षापासून हिंदू,मुस्लिम, शिख आणि विविध धर्मीय राहत आहेत. त्या शहरातील वातावरण बिघडवण्याचा प्रयत्न करत आहे.खासदार मेधा ताई तुमच्या बापाचा हा शनिवारवाडा नसून आमच्या बापाचा म्हणजे छत्रपती शिवाजी महाराज यांचा आहे. पोलिसांना विनंती आहे की तुम्ही जर खासदार मेधा कुलकर्णी यांच्यावर गुन्हा दाखल केला नाही तर, मेधा ताईसह पोलिसांना कोर्टात खेचू, असं यावेळी ठोंबरे म्हणाल्या.