Pune Dam Water Storage: पुणेकरांसाठी गुडन्यूज! पाण्याची चिंता मिटली, कोणत्या धरणात किती पाणीसाठा? वाचा सविस्तर

अक्षय बडवे, पुणे|ता. २ सप्टेंबर २०२४

सध्या महाराष्ट्रातील सर्वच जिल्ह्यांमध्ये मुसळधार पाऊस कोसळत आहे. मुंबई, पुणे, सातारा, सांगली, कोल्हापूरमध्ये मागच्या काही आठवड्यांत पावसाने थैमान घातले होते. गेल्या १५ दिवसांपासून पुणे जिल्ह्याला पावसाने झोडपून काढले आहे. पावसाच्या या तुफान बॅटिंगमुळे पुणे शहराला पाणी पुरवठा करणाऱ्या धरणांमध्ये ९९ टक्के पाणीसाठी तयार झाला आहे. त्यामुळे पुणेकरांचे पाण्याची चिंता मिटली आहे.

पुणेकरांची पाण्याची चिंता मिटली!

पुणेकरांसाठी एक आनंदाची आणि दिलासा देणारी बातमी समोर आली आहे. पुणे शहराला पाणीपुरवठा करणाऱ्या धरणांमधील पाणीसाठ्यात मोठी वाढ झाली आहे. पुणे जिल्ह्याला पाणी पुरवठा करणाऱ्या धरणांमध्ये सध्या ९९ टक्के इतका पाणीसाठा तयार झाला आहे. तर जिल्ह्यातील ४ धरणात मिळून २८ टीएमसी इतके पाणी आहे. सध्या पावसाचा जोर वाढल्याने खडकवासला धरणातून मुठा नदीत विसर्ग बंद करण्यात आला आहे.

कोणत्या धरणात किती पाणीसाठा?

पुणे शहराला पाणीपुरवठा करणाऱ्या खडकवासला धरणात सध्या ९३.३१ टक्के इतका पाणीसाठा आहे तर पानशेत धरणात ९८.९७ टक्के पाणीसाठा, वरसगाव धरणात ९९.१० टक्के आणि टेमघर धरणात १०० टक्क इतका पाणीसाठा आहे. शहराला पाणी पुरवठा करणार ही चारही धरणे १०० टक्के भरण्याच्या उंबरठ्यावर आहेत. त्यामुळे पुणेकरांची पाण्याची चिंता आता मिटली आहे.

लातूरमध्ये पावसाचा कहर

लातूरच्या रेणा मध्यम प्रकल्पात पाण्याचा येवा मोठ्या प्रमाणात वाढला आहे. धरण क्षेत्रातल्या भागात रात्री पासून पावसाचा जोर वाढल्याने पाण्याचा येवा मोठ्या प्रमाणात वाढला आहे. तर काही वेळात धरण भरल्यानंतर प्रकल्पाचे दोन दरवाजे उघडण्यात येणार आहेत. दरम्यान बैल पोळा सणाच्या पूर्वसंध्येलाच धरण भरताना पाहून या भागातील शेतकरी आणि नागरिकांमध्ये आनंदाचे वातावरण निर्माण झाले आहे.