Pune Rain: पहिल्याच पावसात पुणे तुंबले! वाघोलीतील रस्त्यांवर गुडघाभर पाणी; वाहनं पाण्यात अडकली; पाहा VIDEO

• वाघोलीत मुसळधार पावसामुळे रस्ते जलमय

• पुण्यात पहिल्याच पावसात वाहतुकीचा खोळंबा

• पाण्यात अडकली वाहने

• पुणे महापालिकेच्या कामकाजावर नागरिक नाराज

अक्षय बडवे, पुणे

पुण्यात पावसाचा हाहाकार सुरू आहे. वादळी वाऱ्यासह अचानक जोरदार पावसाने पुण्यात हजेरी लावली. या पावसाने वाघोली परिसराला आज चांगलंच झोडपून काढले. या पावसामुळे उकाड्याने हैराण झालेल्या नागरिकांना काहीसा दिलासा मिळाला असला तरी दुसरीकडे वाघोलीतील अनेक रस्ते पाण्याखाली गेल्याने नागरिकांचे मोठ्या प्रमाणात हाल झाले. पुण्यातील सर्वच भागामध्ये पावसाचा धुमाकूळ सुरू आहे. अचानक आलेल्या पावसामुळे पुणेकरांचा चांगलीच तारंबळ उडाली.

मुख्य रस्ते, चौक तसेच अंतर्गत भागांमध्ये गुडघाभर पाणी साचल्याचे चित्र पाहायला मिळाले. वाहन चालकांना पाण्यातून मार्ग काढत वाहने चालवावी लागली. अनेक दुचाकी बंद पडल्याने नागरिकांची मोठी गैरसोय झाली. काही ठिकाणी वाहतूकही संथ गतीने सुरू होती.

स्थानिक नागरिकांनी महानगरपालिकेच्या कारभारावर तीव्र नाराजी व्यक्त केली आहे. पावसाळ्यापूर्वी नालेसफाई आणि पाणी निचऱ्याची कामे व्यवस्थित न झाल्याने दरवर्षी अशीच परिस्थिती निर्माण होत असल्याचा आरोप नागरिकांकडून करण्यात येत आहे.

दरम्यान, पावसामुळे वातावरणात गारवा निर्माण झाला असून उष्णतेपासून नागरिकांना दिलासा मिळाला आहे. मात्र पावसाच्या पहिल्याच जोरदार सरीत वाघोलीतील पायाभूत सुविधांचा बोजवारा उडाल्याचे पुन्हा एकदा समोर आले आहे.

हवामान खात्याकडून पुणे शहराला आज येलो अलर्ट देण्यात आला होता. दुपारनंतर शहरात ढगाळ वातावरण आणि विजेचा गडगडाट सुरू झाला. त्यानंतर पावसाने जोर पकडला. पुणे शहरातील सर्वच परिराला पावसाने झोडपून काढले. पुढील २ दिवस पुणे जिल्ह्यामध्ये पाऊस पडणार असल्याचा अंदाज हवामान खात्याने वर्तवला आहे.