Pune News: माहेरून पैसे घेऊन ये नाहीतर..., सासरच्यांकडून मानसिक अन् शारीरिक छळ; विवाहितेने संपवलं आयुष्य

सचिन जाधव, पुणे

पुण्यामध्ये वैष्णवी हगवणे प्रकरणाची पुनरावृत्ती झाली आहे. सासरच्या छळाला कंटाळून विवाहितेने आयुष्य संपवल्याची धक्कादायक घटना समोर आली आहे. पुण्यातील दत्तावाडी परिसरात ही घटना घडली. माहेरून पैसे आणण्यासाठी सासरची मंडळी या महिलेचा शारीरिक आणि मानसिक छळ करत होते. या त्रासाला कंटाळून विवाहितेने गळफास घेत आयुष्य संपवलं. या घटनेमुळेपुण्यात खळबळ उडाली आहे. या प्रकरणी महिलेच्या नवरा, सासू आणि सासऱ्याविरोधात गुन्हा दाखल केला.

मिळालेल्या माहितीनुसार, पुण्यात सासरच्या छळास कंटाळून विवाहितेने आत्महत्या केली. माहेरून पैसे न आणल्याने सासरी होत असलेल्या छळाला कंटाळून या विवाहितेने राहत्या घरी आयुष्य संपवलं. ही घटना दत्तवाडी परिसरात सोमवारी सकाळी १० वाजता घडली. साजिदा असीम शेख (वय २३, वर्षे) असं आत्महत्या केलेल्या महिलेचे नाव आहे. ही महिला पर्वती परिसरातील जनता वसाहतमध्ये राहत होती.

याबाबत विवाहितेच्या आईने फिर्याद दिली आहे. त्यानुसार, विवाहितेचा पती आणि सासू-सासऱ्याविरोधात पर्वती पोलिस ठाण्यात गुन्हा दाखल करण्यात आला आहे. साजिदाला सातत्याने माहेरून पैसे आणण्याचा दबाव टाकला जात होता. त्यासाठी तिला शारीरिक आणि मानसिक त्रास देण्यात येत होता. या छळाला कंटाळून तिने घरी गळफास घेऊन आयुष्य संपवले असल्याचे फिर्यादीत म्हटले आहे. त्यावरून पोलिसांनी तिघांविरोधात गुन्हा दाखल केला आहे. या प्रकरणाचा अधिक तपास पर्वती पोलिस करत आहेत.

दरम्यान, ऑगस्टमध्ये पुण्यात एका विवाहितेने आत्महत्या केल्याची घटना घडली होती. स्नेहा झेंडगे असं या विवाहितेचे नाव होते. स्वयंपाक नीट येत नाही आणि माहेरून २० लाख रुपये घेऊन ये यासाठी या विवाहितेचा सासरच्यांकडून छळ होत होता. या त्रासाला कंटाळून तिने आत्महत्या केली होती. या प्रकरणी सासरच्या ७ जणांविरोधात गुन्हा दाखल करण्यात आला होता. पोलिस या प्रकरणाचा तपास करत आहेत.