Pune : पुण्यात भयंकर दुर्घटना! तरूणी धावत्या PMPML बसमधून पडली, मागून येणाऱ्या स्कुल बसने चिरडले

पुण्यातून धक्कादायक घटना समोर आली आहे. पुण्यातील सिंहगड रोडवर PMPML बसमधून पडून एका तरुणीचा मृत्यू झाला आहे. सिंहगड रोडवरील ब्रह्मा हॉटेलसमोर सकाळी १० च्या सुमारास ही घटना घडली. प्राथमिक माहितीनुसार, बसमध्ये गर्दी असल्याने तरुणी खाली पडली असल्याची माहिती आहे. या घटनेने परिसरात खळब उडाली असून पोलीस तपास सुरु आहे. दरम्यान तरुणीच्या मृत्यूला जबाबदार कोण असा संतप्त सवाल नागरिकांकडून उपस्थित केला जात आहे.

मिळालेल्या माहितीनुसार, खानापूरहून स्वारगेटच्या दिशेने पीएमपीएलची बस प्रवास करत होती. सकाळच्या वेळेमुळे बसमध्ये मोठ्या प्रमाणात प्रवाशांची गर्दी होती. सिंहगड रोडवरील ब्रह्मा हॉटेलसमोर बस येत असताना गर्दीच्या परिस्थितीत तरुणीचा तोल गेला आणि ती बसमधून रस्त्यावर पडली. दरम्यान, त्याच मार्गावरून पाठीमागून एक स्कूल बस येत होती. रस्त्यावर पडलेल्या तरुणीला या बसची धडक बसली आणि ती स्कूल बसच्या चाकाखाली आली.

या भीषण अपघातात तरुणीचा दुर्दैवी मृत्यू झाला. घटनेनंतर परिसरात काही काळ गोंधळाचे वातावरण निर्माण झाले होते. अपघाताची माहिती मिळताच नागरिकांनी घटनास्थळी धाव घेतली. संबंधित यंत्रणांना घटनेची माहिती देण्यात आली. पोलिसांनी घटनास्थळी दाखल होत परिस्थितीची पाहणी केली असून, अपघात नेमका कसा घडला, याबाबत अधिक तपास सुरू आहे.

या घटनेमुळे पुन्हा एकदा PMPML बसमधील वाढती गर्दी, प्रवाशांच्या सुरक्षिततेचा प्रश्न आणि बस थांब्यांवरील वाहतूक व्यवस्थेचा मुद्दा ऐरणीवर आला आहे. विशेषतः सकाळच्या गर्दीच्या वेळेत बसमध्ये क्षमतेपेक्षा अधिक प्रवासी प्रवास करत असल्याने अपघाताचा धोका वाढत असल्याचे नागरिकांचे म्हणणे आहे. दरम्यान, मृत तरुणीची ओळख पटविण्याचे काम सुरू असून, पोलिसांकडून घटनेचा पुढील तपास केला जात आहे.