कुटुंब अंत्यविधीसाठी गेलं; चोरटे दरवाजा तोडून घरात घुसले, मारला वॉशिंग मशीनमधील दागिने आणि पैशांवर डल्ला

पुणे : पुण्यात चोरीच्या घटना सुरूच आहे. पुण्यात एका घरातून वॉशिंग मशीनमध्ये ठेवलेले ९९ हजार रुपये किंमतीचे दागिने आणि रोख रक्कम चोरट्यांनी लंपास केल्याची घटना घडली आहे. अंत्यविधीसाठी गेलेल्या कुटुंबाच्या घरी चोरट्यांनी डल्ला मारत लाखोंचा ऐवज लंपास केला. पुण्यातील कात्रज भागात ही घटना उघडकीस आली आहे. ३० वर्षीय व्यक्तीने याबाबत पोलिसात तक्रार केली आहे. आंबेगाव पोलीस ठाण्यात याप्रकरणी अज्ञात व्यक्तींविरोधात गुन्हा नोंदवण्यात आला आहे.

मिळालेल्या माहितीनुसार, पुण्यातील कात्रज भागात असलेल्या सच्चाई माता मंदिर परिसरात २६ नोव्हेंबर ते २८ नोव्हेंबरदरम्यान घडला. तक्रारदार हे त्यांच्या कुटुंबासह त्यांच्या साडूच्या भावाच्या अंत्यविधीसाठी लातूर जिल्ह्यातील निलंगा येथे गेले होते. यावेळी घर बंद असल्याचा फायदा घेऊन चोरट्यांनी बंद घराचा दरवाजा हत्याराच्या साह्याने तोडला. त्यानंतर चोरून घरात प्रवेश केला.

चोरट्यांनी घरात अनेक ठिकाणी हाती काही लागत आहे का, यासाठी शोध घेतला. तेव्हा त्यांची नजर घरामध्ये असलेल्या वॉशिंग मशीनकडे गेली.तेव्हा त्यांनी वॉशिंग मशीन उघडली. त्यात एक डब्बा ठेवल्याचं दिसून आलं.या डब्ब्यात सोन्याचे दागिने आणि काही रोख रक्कम फिर्यादी यांनी ठेवली होती.

पोलिसांनी दिलेल्या माहितीनुसार, या डब्यामध्ये साधारण ९९ हजार रुपये किंमतीचे दागिने आणि काही रोख रक्कम होती. चोरट्यांनी तो दागिन्यांचा डबा घेऊन तिथून पसार झाले. आंबेगाव पोलिसांकडून याचा तपास सुरू आहे.