Pune : पोलीस होण्याचं स्वप्न अपूर्ण राहिलं; पुण्यात भरतीदरम्यान धावताना तरुणाचा मृत्यू

सागर आव्हाड, पुणे

Pune Police Recruitment Exam Death पुण्यातून मोठी बातमी समोर आली आहे. पोलीस भरती दरम्यान सोळाशे मीटर रनिंग करत असताना एका तरुणाचा मृत्यू झाला आहे. मृत तरुणाचे नाव पुरुषोत्तम बुरकुल असे आहे. दरम्यान त्याच्या मृत्यूचे कारण अद्याप समोर आलेले नाही. सदर घटना पुण्यातील शिवाजीनगर ग्राऊंड वरती घडला असून या घटनेने पोलीस भरतीमध्ये मोठी खळबळ उडाली आहे. पोलीस होण्याचं स्वप्न पाहणाऱ्या पुरुषोत्तमच्या मृत्यूनंतर त्याच्या कुटुंबियांवर दुःखाचा डोंगर कोसळला आहे.

संभाजीनगरमध्ये काही दिवसांपूर्वी एका तरुणाचा पोलीस भरती दरम्यान धावण्याची चाचणी देताना एका तरुणाचा मृत्यू झाला. ही घटना ताजी असतानाच आता पुण्यात देखील सोळाशे मीटर रनिंग करत असताना पुरुषोत्तम बुरकुल या युवकाचा मृत्यू झाला. मिळालेल्या माहितीनुसार, पुरुषोत्तम बुरकुल हा तरुण चौथा राऊंड सुरु असताना अचानक कोसळला.

त्याला रुग्णालयात उपचारासाठी दाखल करण्यात आले. मात्र उपचारापूर्वीच त्याचा मृत्यू झाल्याची माहिती आहे. या घटनेने पोलीस भरतीमध्ये मोठी खळबळ उडाली असून पुन्हा एकदा उमेदवारांच्या सुरक्षिततेचा प्रश्न ऐरणीवर आला आहे. तसेच पुरुषोत्तमच्या मृत्यूने त्याच्या कुटुंबियांवर दुःखाचा डोंगर कोसळला आहे.