Pune Crime : आधीच कोयता गँगची दहशत, आता पिस्तुलधारकांचा सुळसुळाट; मध्य प्रदेश कनेक्शन आलं समोर

अक्षय बवडे, साम टीव्ही

पुणे : पुण्यात कोयत्याने दहशत माजवणाऱ्या घटनांमध्ये वाढ होत असल्यााचे पाहायला मिळत आहे. त्यानंतर आता पुण्यातील विविध ठिकाणाहून पुणे पोलिसांच्या गुन्हे शाखेने ७ पिस्तूल जप्त करण्यात आले आहेत. या सर्व ७ पिस्तूल आणि त्यासोबत असलेले जिवंत काडतुसे वापरणाऱ्या ९ जणांना पोलिसांनी अटक करण्यात आली आहे.

अटक करण्यात आलेल्या ९ जणांचे पिस्तूल बाळग्ण्यासाठीचे अनेक कारणं आहेत. काही जणांनी जमिनीच्या वादातून स्वतःचे रक्षण करण्यासाठी पिस्तूल विकत घेतले आहेत तर काही जणांनी वर्चस्व राहावं यासाठी या पिस्तूल खरेदी केल्याचं तपासातून निष्पन्न झालं आहे. विशेष म्हणजे हे सर्व पिस्तूल मध्य प्रदेशमधून अगदी कमी किंमतीत आणलं जात. या पिस्तूलची विक्री पुढे लाखो रुपयांमध्ये होते हे सुद्धा समोर आलं आहे.

या प्रकरणात सागर ढेबे या तरुणासह इतर ८ जणांना पोलिसांनी अटक केली आहे. सागरवर याआधी पुण्यातील अनेक पोलीस ठाण्यात गंभीर स्वरूपाचे गुन्हे दाखल आहेत. या निमित्ताने पुण्यात गुन्हेगारांच्या हाती पिस्तूल येण्याचे मध्य प्रदेश कनेक्शन सुद्धा समोर आलं आहे. काही दिवसांपूर्वी शरद मोहोळ याच्या हत्येच्या बदला आणि कोथरूडमध्ये वर्चस्व राहावं यासाठी तरुणांनी जे पिस्तूल आणलं होतं, ते सुद्धा मध्य प्रदेशमधूनच आणले होतं.

महाराष्ट्र-मध्य प्रदेश सीमेवर असलेल्या ३ ते ४ गावांमध्ये हे पिस्तूल अगदी सहजपणे मिळतात. पुणे किंवा इतर शहरांपासून हे ठिकाणं जवळ असल्यामुळे गुन्हेगार सुद्धा अशा ठिकाणांना प्राधान्य देत आहेत. मध्य प्रदेशातून पिस्तूल आणि त्याचे काडतुसे आणतात. त्यानंतर इथे मोठ्या किमतींवर त्याची विक्री करतात. पुण्यात आज पकडलेल्या ७ पिस्तूलची किंमत जरी २ लाख ८६ हजार असेल, तर ती मुख्य आरोपीने इतरांना कितीला विकली याचा तपास पोलिसांकडून सुरू आहे.