Pune News : पुण्यात हिट अँड रनचा थरार! मॉर्निंग वॉकला घराबाहेर पडला, तो परतलाच नाही.. CCTV कॅमेऱ्यात कैद झाला शेवटचा फोटो

सागर आव्हाड, साम टीव्ही, प्रतिनिधी

पुणे : मॉर्निंग वॉकसाठी घराबाहेर पडलेल्या एका तरुणाचा दुर्दैवी अपघातामध्ये मृत्यू झाला आहे. या अपघाताचे काही धक्कादायक फोटो देखील समोर आले आहेत. घटनास्थळी कोणतेही सामान न सापडल्याने मृत तरुणाची अद्याप ओळख पटलेली नाही. हा अपघात कसा झाला याचा शोध पोलीस घेत आहेत.

मिळालेल्या माहितीनुसार, पुण्यातील उंड्री येथील न्याटी एस्टेबन सोसायटीजवळ आज (१ एप्रिल रोजी) एका अपघातामध्ये मॉर्निंग वॉक करणाऱ्या तरुणाचा मृत्यू झाला. हा अपघात कसा झाला याची माहिती अद्याप मिळालेली नाही. पण प्रत्यक्षदर्शींनी दिलेल्या माहितीनुसार, सकाळी मोकळ्या हवेत वॉकसाठी घराबाहेर पडलेल्या या तरुणाला चारचाकी कारने धडक दिली.

चारचाकी कारने दिलेल्या धडकेमध्ये मॉर्निंग वॉकसाठी घराबाहेर पडलेल्या तरुणाचा मृत्यू झाल्याची माहिती प्रत्यक्षदर्शींनी दिली आहे. हा तरुण कोण? तो कुठे राहतो? त्याचा अपघात कसा झाला? याचा शोध पोलीस घेत आहेत. दरम्यान हा तरुण उंड्री येथील न्याटी एस्टेबन सोसायटीजवळ धावताना सीसीटीव्ही कॅमेऱ्यामध्ये कैद झाला होता.

मोकळ्या हवेमध्ये वॉक करण्यासाठी अनेकजण सकाळी घराबाहेर पडत असतात. पण अशा अपघाताच्या घटना घडत असल्याने नागरिकांमध्ये भीतीचे वातावरण निर्माण झाले आहे. भरधाव वाहने वॉकिंग करणाऱ्या नागरिकांना धडकून जात असल्याच्या घटना पुण्यात दिवसेंदिवस वाढत आहेत.