पुण्यात अपघाताचा थरार; नवले पुलाजवळ दिवसभरात दुसरा भीषण अपघात

अक्षय बडवे, साम टीव्ही

पुण्यात अपघातांची मालिका सुरू आहे. पुण्यातील नवले पुलाजवळ पुन्हा अपघात झाला आहे. पुलाजवळ दिवसभरात दुसरा अपघात घडला आहे. या अपघाताने पुलावर एकच खळबळ उडाली.

पुणेकरांची सकाळ आता अपघाताने होऊ लागली आहे. विशेष म्हणजे पुण्यातील नवले पुलाजवळ सकाळ वाहन अपघातानेच होत आहे. नवले पुलाजवळच्या ब्लॅक स्पॉटवर आज सोमवारी अपघात झाला. या अपघातात दोन जण जखमी झाले होते. त्यानंतर आता पुलाजवळ सायंकाळी पुन्हा एकदा अपघात झाला आहे.

नवले पुलाजवळ असलेल्या स्वामी नारायण मंदिर परिसरात अपघात झाला. या अपघातात चार चाकी वाहनाचे मोठे नुकसान झालं आहे. अपघातानंतर रस्त्यावर दोन्ही बाजूने वाहतूक कोंडी झाली. अपघाताची माहिती मिळताच पोलिसांनी घटनास्थळी धाव घेतली. या अपघातात एक जण जखमी झाल्याची माहिती हाती आली आहे.

अपघात झाल्यानंतर पोलिसांनी जखमींना रुग्णालयात दाखल केलं. किरकोळ जखमी झालेल्या व्यक्तीवर रुग्णालयात तातडीने उपचार सुरु करण्यात आले. चालकाचे वाहनावरील नियंत्रण सुटल्यामुळे वाहन थेट डिव्हायडरला धडकलं. त्यामुळे वाहनाचा अपघात झाला. या अपघातात वाहनाचं मोठं नुकसान झालंय. अपघातांचं सत्र थांबत नसल्याने पुणेकरांकडून चिंता व्यक्त केली जात आहे.

महिला नेत्याचा अपघाती मृत्यू

अजित पवार गटाच्या महिला प्रदेश उपाध्यक्ष नेत्याचे अपघाती निधन झालं. गडचिरोलीत पाचगावजवळ भीषण दुर्घटना घडली. या अपघात पतीसह चालक गंभीर जखमी झाला. रविवारी रात्री उशिरा साडेबारा वाजता पाचगाव जवळून जाताना दुभाजक ओलांडताना वेगवान वाहनाने त्यांच्या कारला मागून भीषण धडक दिली. गीता सुशील हिंगे असे अपघातात मृत्यू झालेल्या महिला नेत्याचे नाव आहे.