सर्वात मोठी बातमी! शरद पवारांचा राष्ट्रवादी काँग्रेस पक्ष घड्याळ चिन्हावर निवडणूक लढणार?

सागर आव्हाड, साम टीव्ही

पुण्यात महापालिका निवडणुकीमुळे राजकीय घडामोडींना वेग आला आहे. पालिकेवर सत्ता मिळवण्यासाठी अजित पवारांच्या राष्ट्रवादीकडून जोरदार चाचपणी सुरू झाली आहे. पुणे महापालिकेची सत्ता मिळवण्यासाठी दोन्ही राष्ट्रवादी एकत्र येणार असल्याची चर्चा आहे. दोन्ही पक्षातील नेत्यांनी बैठकांचा सपाटा देखील लावला आहे. तर या निवडणुकीसाठी दोन्ही राष्ट्रवादीचे उमेदवार घड्याळ चिन्हावर लढणार असल्याची माहिती सूत्रांनी दिली आहे.

पुणे महापालिकेच्या निवडणुकीसाठी आज शुक्रवारी दोन्ही राष्ट्रवादीच्या नेत्यांची बैठक झाली. या बैठकीत दोन राष्ट्रवादी एकाच्या चिन्हावर निवडणूक लढवतील, असा प्रस्ताव अजित पवारांनी शरद पवार गटाच्या नेत्यांना दिला. अजित पवारांचा निरोप आज शशिकांत शिंदे यांना थोड्यावेळात कळवळा जाणार आहे.

बैठकीत दोन्ही राष्ट्रवादीमध्ये जागा वाटपाची कोणतीही अडचण नाही. या युतीची आज रात्री किंवा उद्या युतीची घोषणा होण्याची शक्यता आहे. मात्र घड्याळ चिन्ह राष्ट्रवादी शरद पवार पक्षाला मान्य होणार का ? हे पाहावे लागेल. आज संध्याकाळपर्यंत निरोप द्या, अजित पवारांनी असा प्रस्ताव बैठकीला आलेल्या नेत्यांकडे दिला आहे.

पुण्यात राष्ट्रवादी आणि शिवसेना युतीची चाचपणी

तत्पूर्वी, पुण्यात राष्ट्रवादी आणि शिवसेना युतीची चाचपणी सुरु आहे. दोन पक्षांमध्ये संवाद सुरू आहे. भाजप शिवसेनेला सन्मान जनक जागा द्यायला तयार नसल्याचे पाहायला मिळत आहे. त्यामुळे राष्ट्रवादीकडून शिवसेनेसोबत चर्चा सुरू असल्याची माहिती हाती आली आहे.

पुण्यातील शिवसेनेचा एक मोठा नेता यासंदर्भात प्रस्ताव घेऊन एकनाथ शिंदे यांच्या भेटीला गेला होता. अजित पवारांची राष्ट्रवादी आणि एकनाथ शिंदे यांची शिवसेना पुणे महानगर पालिका एकत्र लढविण्यासंदर्भात चर्चा सुरू आहेत.