Pune Municipal: महापौर, गटनेता ठरलं, पुणे महापालिकेच्या स्थायी समितीचे अध्यक्षपद कोणाला? भाजपमध्ये "फिल्डिंग" सुरू

तब्बल ११९ जणांचे बलाबल घेऊन भाजप ने पुणेअपलिकेवर झेंडा रोवला. महापालिकेची सत्ता भाजपला मिळाल्यानंतर महापौर, उपमहापौर आणि पक्षाकडून गटनेतेपदाची नावं निश्चित करण्यात आली. आता या तीन प्रमुख नावांची निवड झाल्यानंतर आता विविध समित्यांच्या पदनिवडीकडे सर्वांचे लक्ष लागले आहे. पुणेकरांनी दाखवलेल्या विश्वासाला न्याय देण्याचे मोठे आव्हान भाजपसमोर उभे आहे. ११९ जणांपैकी या जागांवर कोणाची वर्णी लावायची असा प्रश्न पक्षासमोर नक्की उभा राहणार आहे.

भाजपकडून महापौरपदी मंजुषा नागपुरे तर उपमहापौरपदी आरपीआयचे परशुराम वाडेकर यांची निवड निश्चित झाली तर गटनेतेपदी गणेश बिडकर यांची नियुक्ती करण्यात आली. या निवडीमुळे महापालिकेतील सत्ता समीकरणे स्पष्ट झाले असले तरी आता लक्ष लागलं आहे ते म्हणजे स्थायी समितीकडे. राजकीय पटलावर स्थायी समितीच्या अध्यक्षपदाची कोणाची वर्णी लागणार याकडे सगळ्यांचं लक्ष लागलं आहे.

पक्षातील १२ नगरसेवकांना स्थायी समितीच्या सदस्यपदी संधी मिळणार असून, त्यातूनच अध्यक्ष निवडला जाणार आहे. सर्व आर्थिक निर्णय स्थायी समितीमार्फत घेतले जात असल्याने या समितीचे अध्यक्षपद महापालिकेत अत्यंत महत्त्वाचे मानले जाते. स्थायी समितीच्या अध्यक्षपदासाठी सध्या श्रीनाथ भिमाले, बॉबी उर्फ अनिल टिंगरे, धीरज घाटे, राजेंद्र शिळीमकर यांची नावं आघाडीवर असल्याच्या चर्चा आहेत.

गेल्या चार वर्षांपासून पुणे महानगरपालिकेवर प्रशासक राज होता. मात्र आता स्पष्ट बहुमतासह सत्तेवर आलेल्या भाजपसमोर शहरातील प्रलंबित तसेच येणाऱ्या काळातील विकासाची अनेक प्रकल्प पूर्ण करण्याचं मोठे आव्हान असणार आहे. मुख्यमंत्री देवेंद्र फडणवीस यांनी पुणेकरांना विकासाची अनेक आश्वासने दिली आहेत.

यामध्ये प्रामुख्याने शहरातील वाहतूक कोंडी सोडवण्यासाठी नवीन रस्ते उभारणे, सार्वजनिक वाहतूक व्यवस्था सक्षम करणे, पिण्याच्या पाण्याचा प्रश्न सोडवणे आणि मूलभूत नागरी सुविधा सुधारण्याचे आश्वासन देण्यात आले होते. या सर्व गोष्टी पुढे नेण्यासाठी महापालिकेतील स्थायी समितीचे निर्णय आणि त्यांच्याकडून होणाऱ्या कामाची अंमलबजावणी महत्वाची ठरणार आहे.