Pune MHADA : पुणेकरांसाठी आनंदवार्ता! ४१८६ म्हाडाच्या घरांची उद्या सोडत; कुठे आणि कशी होणार? वाचा सविस्तर

पुणेकरांसाठी मोठी बातमी समोर आली आहे. म्हाडाचा विभागीय घटक पुणे गृहनिर्माण व क्षेत्रविकास मंडळातर्फे जिल्ह्यातील विविध गृहनिर्माण प्रकल्पांतील ४१८६ घरांची विक्री होणार आहे.या विक्रीसाठी संगणकीय सोडत १० फेब्रुवारी म्हणजेच मंगळवारी दुपारी १२.०० वाजता काढण्यात येणार आहे. सभापती शिवाजीराव आढळराव पाटील यांच्या हस्ते ही संगणकीय सोडत काढण्यात येणार असल्याची घोषणा पुणे म्हाडा मार्फत करण्यात आली आहे.

पुणे मंडळातर्फे सोडतीसाठी ११ सप्टेंबर २०२५ रोजी ४१८६ घरांच्या विक्रीसाठी जाहिरात प्रसिद्ध करण्यात आली होती. पुणे, पिपरी चिंचवड महानगरपालिका क्षेत्रातील तसेच पुणे महानगर प्रदेश विकास प्राधिकरण अंतर्गत २० टक्के सर्वसमावेशक योजनेतील ३३२२ घरांचा आणि १५ टक्के सामाजिक गृहनिर्माण योजनेतील ८६४ घरांच्या सोडतीत समावेश करण्यात आला आहे.

अर्जदारांच्या विनंतीनुसार, काही तांत्रिक अडचणी व निवडणूक आचारसंहिता या कारणांमुळे अर्ज भरण्यासाठी दोनदा मुदतवाढ देण्यात आली होती. दरम्यान आता या प्रकल्पाच्या घरांची सोडत उद्या म्हणजेच मंगळवारी दि. १० फेब्रुवारी रोजी होणार आहे. पुणे जिल्हा परिषदेच्या सभागृहात उद्या १२ वाजता या सोडतीचा कार्यक्रम होणार आहे. 'म्हाडा'चे उपाध्यक्ष संजीव जयस्वाल हे ऑनलाईन पद्धतीने या कार्यक्रमाला उपस्थित राहणार आहेत.

या प्रकल्पाच्या ४१८६ घरांसाठी एकूण २,५८,८३२ अर्ज प्राप्त झाले आहेत. त्यातील २,१५,९६५ अर्जदारांनी अनामत रकमेचा भरणा केलेला आहे. त्यांचा सोडतीमध्ये समावेश करण्यात आलेला आहे. पुणे मंडळाच्या या सोडतीला अर्जदारांनी भरघोस प्रतिसाद दिला आहे.या सोडतीला हजर राहण्याचे आवाहन पुणे म्हाडा मार्फत करण्यात आले आहे. मात्र ज्यांना अर्जदारांना सोडतीला येणं शक्य नाही, त्यांच्यासाठी मेसेजद्वारे एक लिंक पाठवली जाणार आहे. त्याद्वारे सोडत पाहू शकता.