Pune : पुण्यातील कुख्यात गुंड गजानन मारणेला जामीन; नेमकं काय प्रकरण? जाणून घ्या

अक्षय बडवे, पुणे

पुण्यातून मोठी बातमी समोर आली आहे. मोक्का आरोपी कुख्यात गुंड गजानन मारणेला विशेष मोक्का न्यायालयाकडून जामीन मंजूर झाला आहे. एका आयटी अभियंता तरुणाला मारहाण केल्याप्रकरणी आरोपी गजानन मारणेला २४ फेब्रुवारी रोजी अटक करण्यात आली होती. याप्रकरणी कोथरूड पोलिसांनी गजानन मारणे आणि इतर सदस्यांवर मोक्का लावला होता, मात्र त्यांना आता जामीन मंजूर झाल्याने खळबळ उडाली आहे.

मिळालेल्या माहितीनुसार, कोथरूडमधील आयटी अभियंता तरुण १९ फेब्रुवारी रोजी दुपारी दुचाकीवरून घरी निघाला होता. वाटेत भेलकेनगर परिसरात रस्त्यावर गर्दी होती. या गर्दीतून दुचाकी काढण्याचा प्रयत्न करताना तिघांनी त्या तरुणाला बेदम मारहाण केली. याबाबत अभियंता तरुणाने कोथरूड पोलिस ठाण्यात फिर्याद दिली होती.

त्यानुसार पोलिसांनी ओम तीर्थराम धर्मजिज्ञासू (वय-३५), किरण कोंडिबा पडवळ (वय-३१) अमोल विनायक तापकीर (वय-३५, तिघे रा. शास्त्रीनगर, कोथरूड) या तिघांना अटक केली होती. या गुन्ह्यातील अन्य एक आरोपी श्रीकांत संभाजी पवार पसार झाला होता. तपासात आरोपी मारणे टोळीशी संबंधित असल्याचे समोर आले.

या घटनेनंतर केंद्रीय राज्यमंत्री मुरलीधर मोहोळ यांनी ‘पुणे पोलिसांनी आत्मपरीक्षण केले पाहिजे. पोलिस डोळे बंद करून बसले आहेत का?’ या भाषेत पोलिसांच्या कार्यपद्धतीवर नाराजी व्यक्त केली होती. दरम्यान, या प्रकरणात पोलिसांनी तीन आरोपींसह टोळीप्रमुख गजानन मारणे, त्याचा भाचा रूपेश मारणे याच्यावर मकोका कायद्यान्वये कारवाई केली.

मात्र आता या खटल्यात अनपेक्षित वळण आले आहे. तक्रारदार असलेले देवेंद्र जोग स्वतः विशेष मोक्का न्यायालयात हजर झाले आणि त्यांनी महत्त्वाचे प्रतिज्ञापत्र सादर केले. त्यात त्यांनी नमूद केले की, त्यांना कोणीही मारहाणीसाठी चिथावणी दिली नव्हती आणि आता त्यांना आरोपींविरुद्ध कोणतीही तक्रार नाही. या प्रतिज्ञापत्राच्या आधारे गजानन मारणेच्या वकिलांनी जामीन अर्ज दाखल केला होता, आणि न्यायालयाने तो मंजूर केला.