Pune Crime : पुण्यात कोयता गँगचा हैदोस! टपरी चालकावर जीवघेणा हल्ला, दुकानांची तोडफोड; Video

सागर आव्हाड, साम टीव्ही, प्रतिनिधी

Pune Koyta Gang : पुण्यातून कोयता गँगकडून तोडफोड झाल्याची घटना उघडकीस आली आहे. पुण्यातील कोंढव्यामध्ये कोयता गँगने हैदोस घातला. गँगमधील तरुणांनी कोंढवा परिसरातील एका टपरी चालकावर हल्ला केला. टपरीचीही तोडफोड केली. ही संपूर्ण घटना परिसरातील सीसीटीव्ही कॅमेऱ्यामध्ये कैद झाली आहे.

मिळालेल्या माहितीनुसार, काल रात्री (२० जुलै) पुण्याच्या कोंढवा परिसरात कोयता गँगने एका टपरी चालकावर हल्ला करत त्याच्या दुकानाची तोडफोड केली. गँगमधील तरुणांनी दुकानातील गल्ल्यात हात घालून पैसे काढण्याचा देखील प्रयत्न केला. या घटनेमुळे परिसरात संताप व्यक्त केला जात आहे. कोयता गँगकडून करण्यात आलेल्या तोडफोडीचे सीसीटीव्ही फुटेज सोशल मीडियावर व्हायरल होत आहे.

टपरीच्या चालकावरील हल्ल्यापूर्वी शितल पेट्रोल पंपाजवळील चार ते पाच दुकानांवरही अशाच पद्धतीने हल्ले करण्यात आल्याची माहिती प्रत्यक्षदर्शींनी दिली आहे. धक्कादायक बाब म्हणजे या प्रकरणात अद्याप पोलीस स्थानकामध्ये गुन्हा नोंदवण्यात आलेला नाही. त्यामुळे परिसरातील नागरिकांमध्ये भीतीचे वातावरण पसरले आहे.

भवानी पेठेत कोयता गँगची दहशत

पुण्यातील भवानी पेठ परिसरात कोयताधारी तरुणांनी दहशत निर्माण करण्याचा प्रयत्न केला. किरकोळ भांडणावरून काही युवकांनी हातांमध्ये कोयते आणि तलवारी घेत जवळपास दहा ते बारा वाहनांची तोडफोड केली. आम्हीच इथले भाई, आमच्या नादाला लागू नका असे म्हणत तरुणांनी लोकांना घाबरवण्याचा प्रयत्न केला. या घटनेमुळे परिसरात भीतीचे वातावरण निर्माण झाले.