Vaishnavi Hagawane: वैष्णवी हगवणे प्रकरणात ५ जणांना बेड्या, कोण कोण गजाआड? सहाव्या आरोपीला अटक कधी?

वैष्णवी हगवणे हिने सासरच्यांकडून होणाऱ्या छळाला कंटाळून आत्महत्या केली. या घटनेनंतर राज्यभरातून तीव्र संताप व्यक्त होत असून, पोलीस तपासात रोज नवे धक्कादायक माहिती उघडकीस होत आहे.

आज पहाटे पोलिसांनी कारवाई करत सासरे राजेंद्र हगवणे आणि दीर सुशील हगवणे यांना स्वारगेट परिसरातून अटक केली आहे. याआधी, सासू लता हगवणे, पती शशांक हगवणे आणि नणंद करिश्मा हगवणे यांना अटक झाली होती. परंतु राजेंद्र आणि सुशील हगवणे यांच्यावर गुन्हा दाखल होताच फरार झाले होते.

१६ मे रोजी हुंडा आणि सासरच्या लोकांकडून होणाऱ्या जाचाला कंटाळून वैष्णवी हगवणे हिने गळफास घेत आत्महत्या केली. यानंतर पोलिसांनी तपास करत सासू - लता हगवणे, पती - शंशाक हगवणे आणि नणंद करिश्मा हगवणे या तिघांना अटक केली. मात्र, गुन्हा दाखल होताच सासरे राजेंद्र हगवणे आणि दीर सुशील हगवणे हे दोघे फरार झाले होते.

राजेंद्र हगवणे हे उपमुख्यमंत्री अजित पवार गटाचे मुळशी तालुक्याचे तालुकाध्यक्ष होते. या घटनेनंतर त्यांना तातडीने पक्षातून बडतर्फ करण्यात आलं. १७ मे पासून राजेंद्र आणि सुशील हगवणे दोघेही फरार होते. मात्र, ६ दिवसांनंतर पोलिसांनी तपासाची चक्रे फिरवत दोन्ही आरोपींना बेड्या ठोकल्या आहेत. दोन्ही आरोपींना पोलिसांनी पहाटे स्वारगेटमधून बेड्या ठोकल्या.

आता सहाव्या आरोपीवर गुन्हा दाखल करण्यात आला असून, त्याला अटक कधी होणार? असा प्रश्न निर्माण झाला आहे. सहावा आरोपी निलेश चव्हाण असून, त्याच्या नावे आधीही गुन्हे दाखल करण्यात आले होते. निलेश चव्हाण हा करिश्मा हगवणे हिचा खास मित्र आहे. त्याचे हगवणे कुटुंबाशी घनिष्ठ संबंध असल्याची माहिती समोर आली आहे. दरम्यान, पोलिसांच्या तपासात आणखी कोणत्या गोष्टींचा उलगडा होणार? आणखी कोणती माहिती समोर येणार? याकडे सगळ्यांचे लक्ष आहे.