PUNE FIITJEE Centre: फिटजी स्कॅम! अडीच लाख रुपये फी, क्लासेसला ठोकलं टाळं; ३०० पेक्षा अधिक विद्यार्थ्यांची फसवणूक

अक्षय बडवे, पुणे

देशातील इतर शहरांबरोबर पुण्यात सुद्धा फिटजीचा स्कॅम समोर आला आहे. पुणे शहरातील फिटजी कोचिंग क्लास बंद झाला आहे. या क्लासेसमध्ये प्रत्येक वर्षासाठी २.५ लाख रुपये फी घेतली जाते. पुण्यात तब्बल ३०० पेक्षा अधिक विद्यार्थ्यांची फसवणूक झाल्याची माहिती समोर आली आहे. जुलै २०२४ पासून पुण्यातील क्लास बंद झालाय. त्यामुळे जीईईची तयार करणाऱ्या विद्यार्थ्यांना मोठा धक्का बसला आहे.

मिळालेल्या माहितीनुसार, जुलै २०२४ पासून पुणे शहरातील स्वारगेट परिसरात असणारा फिटजी कोचिंग क्लास बंद झाला. पुणे शहराच्या पाठोपाठ पिंपरी चिंचवड येथील फिटजी क्लास सेंटर देखील बंद होणार आहे. या कोचिंगमध्ये जीईईची तयारी करण्यासाठी ३०० पेक्षा जास्त विद्यार्थ्यांनी प्रवेश घेतला होता. प्रत्येक वर्षासाठी २.५ लाख रुपये इतकी फी विद्यार्थ्यांनी भरली होती.

फिटजी कोचिंग क्लासेसद्वारे पुण्यात तब्बल ३०० जणांची फसवणूक करण्यात आली आहे. जुलै २०२४ पासून पुण्यातील क्लास बंद झाले आहे. त्यामुळे विद्यार्थी आणि पालक चिंतेत आले आहेत. जुलै महिन्यात पालकांनी तत्कालीन पुणे जिल्हाधिकारी यांना पत्र दिले होते. स्पर्धा परीक्षा तसेच आय आय टीमध्ये प्रवेश देण्यासाठी स्वारगेट येथील क्लासमध्ये शेकडो विद्यार्थी येत होते. २०२४ जुलैपासून क्लासचे शटर बंद असून बाहेर जाहिरातीच्या बोर्डवर धुळीचे साम्राज्य साचले आहे. पिंपरी चिंचवडमध्ये सुद्धा फसवणूक केल्याप्रकरणी तक्रार दाखल करण्यात आली आहे.

दरम्यान, ठाण्यात देखील एका कोचिंग क्लासेसने विद्यार्थ्यांची फसवणूक केली आहे. ठाणे शहरातील बाजारपेठ परिसरात एका मॉलच्या ठिकाणी हा इंजिनिअरिंगच्या विद्यार्थ्यांसाठी खासगी क्लास सुरु करण्यात आलेला होता. संबधित क्लासने जवळपास ८० हून अधिक पालकांकडून ३ कोटी २० लाख इतकी फी आकारली आहे. या क्लासमधील शिक्षण अचानक थांबल्याने मुलांच्या शिक्षणासाठी नवीन क्लाससाठी पैशाची उभारणी करताना पालकांना प्रचंड ओढाताण सहन करावी आहे. याप्रकरणी क्लासेसच्या संचालकांसह अनेकांविरोधात गुन्हा दाखल करत पोलिसांनी या प्रकरणाची चौकशी सुरू केली आहे.