Pune Dam Water Level: पुणेकरांसाठी गुड न्यूज, खडकवासला धरण इतके टक्के भरलं; पाणीकपातीचं संकट टळणार?

अक्षय बडवे, साम टीव्ही

Khadakwasla Dam Storage News Today: पाणीकपातीचा सामना करणाऱ्या पुणेकरांसाठी आनंदाची बातमी आहे. शहराला पाणीपुरवठा करणाऱ्या खडकवासला, पानशेत, टेमघर आणि वरसगाव या धरणांमध्ये वर्षभर पुरेल इतका पाणीसाठा (Water Storage) जमा झाला आहे. त्यामुळे पुणेकरांच्या पिण्याच्या पाण्याचा प्रश्न तुर्तास मिटला आहे.

धरणांमध्ये सोमवारी सायंकाळपर्यंत १७.२१ टीएमसी पाणीसाठा जमा झाला असून गेल्या वर्षीच्या तुलनेत ३.२७ टीएमसी पाणीसाठा कमी आहे. दरम्यान, पाणीपातळीत वाढ जरी झाली असली तरी सुद्धा पुणे शहरात लागू असलेली कपात अद्याप मागे घेतली जाणार नाही

ऑगस्टच्या पहिल्या आठवड्यात आढावा घेऊन निर्णय घेतला जाईल, अशी माहिती मिळतेय. पुणे शहरात पावसाने पाठ फिरवली असली, तरी गेल्या काही दिवसांपासून धरण क्षेत्रात मुसळधार पाऊस कोसळत आहे. त्यामुळे धरणातील पाणीसाठ्यात चांगली वाढ होत आहे.

गेल्या आठवड्यापासून पुणे शहराला पाणीपुरवठा करणाऱ्या टेमघर, वरसगाव, पानशेत आणि खडकवासला धरणाच्या पाणलोट क्षेत्रात पावसाची संततधार सुरू आहे.गेल्यावर्षी याचदिवशी चारही धरणांत मिळून एकूण २०.४८ टीएमसी म्हणजे, ७०.२१ टक्के पाणीसाठा होता.

पुणे शहरासाठी खडकवासला धरण साखळीतून ११.६० टीएमसी, समाविष्ट गावासाठी १.७५ टीएमसी, भामाआसखेड धरणातून २.६७ टीएमसी आणि पवना धरणातून ०.३६ टीएमसी पाणी देण्यात येते.आजमितीला खडकवासला साखळी प्रकल्पात ५९.०३ टक्के म्हणजेच १७.२१ टीएमसी एवढा पाणीसाठा जमा झाला आहे.

Edited by - Satish Daud