![Pune Latest News](http://media.assettype.com/saamtv%2F2023-08%2F244b6a68-ab54-42f4-8d9b-baaee89fb84d%2FUntitled_design___2023_08_23T115141_124.jpg?w=480&auto=format%2Ccompress&fit=max)
सचिन जाधव, प्रतिनिधी...
Pune Crime News: पुणे शहरात मोटारींच्या शोरूममध्ये दरोडा टाकणाऱ्या आंतरराज्यीय टोळीला मुंबईतून अटक केली आहे. पुणे पोलिसांच्या गुन्हे शाखेच्या युनिट पाचच्या पथकाने ही मोठी कारवाई केली. अटकेनंतर पोलिसांनी केलेल्या चौकशीत या टोळीने महाराष्ट्र, कर्नाटक आणि गोवा राज्यात २१ गुन्हे केल्याचे उघडकीस आले आहे.
याबाबत अधिक माहिती अशी की, पुण्याच्या (Pune) बिबवेवाडी येथील एका मोटर्स शोरुममधून चोरट्यांनी चार लाख ९६ हजार रुपयांची रोकड चोरी केली होती. तसेच भारती विद्यापीठ पोलिस ठाण्याच्या हद्दीतही असाच प्रकार घडला होता. या गुन्ह्यांचा छडा लावण्यासाठी गुन्हे शाखेने तपास सुरू केला. तपासावेळी पोलिसांनी एका संशयित मोटारीच्या मालकाचे नाव आणि पत्ता शोधला.
चौकशीमध्ये ही मोटार जळगाव (Jalgaon) येथील असून तीन वर्षांपूर्वी जळगावमध्ये अशा प्रकारच्या सहा घटना घडल्याची माहिती समोर आली. पोलिसांनी त्या चोरट्यांची माहिती काढली. त्यांचा पाठलाग करीत पोलिस नवी दिल्ली, मथुरा, हरिद्वारला गेले. चोरटे मुंबईच्या दिशेने निघाल्याची माहिती मिळाली. त्यानुसार पोलिसांनी चोरट्यांना बांद्रा रेल्वे स्थानकावर ताब्यात घेतले.
सावन दवल मोहिते (वय १९, रा. दहिखेड, जि. अकोला), बादल हिरालाल जाधव (वय १९, रा. मुक्ताईनगर, जि. जळगाव), सोनू नागुलाल मोहिते (वय २२, रा. विचवा, जि. जळगाव), अभिषेक देवराम मोहिते (वय २०), जितू मंगलसिंग बेलदार (वय २३, दोघे रा. धानोरा, जि. जळगाव) आणि पिंटू देवराम चौहान (वय १९, रा. इंदूर, मध्यप्रदेश) अशी आरोपींची नावे आहेत. त्यांच्याकडून साडेसहा लाख रुपयांचा मुद्देमाल जप्त केला आहे. (Latest Marathi News)
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.