Pune News: ७० ते ८० जणांनी मिळून केली मारहाण, पुण्यात दोन गटात तुफान राडा

Pune News

अक्षय बडवे

पुण्यातील हडपसर भागात दोन गटात तुफान राडा झाला आहे. ७० ते ८० जणांनी मिळून चार-पाच जणांना मारहाण केली असून यामुळे परिसरात काहीकाळ तणाव निर्माण झाला होता. दगडफेकही झाली असून परिसरातील झाडांचे मोठे नुकसान झाले आहे. हडपसर पोलीस स्थानकात याप्रकरणी तक्रार दाखल झाली असून पोलिसांनी ५ जणांना अटक केली आहे.

मिळालेल्या माहितीनुसार, शाहरुख शेख वाढदिवसानिमित्त फटाके फोडत होते. यावेळी बाळासाहेब आवटी यांनी फटाके घराच्या बाहेर फोडू नका अशी विनंती केली. त्यावरून वाद सुरू झाला. त्यानंतर जवळपास ७० ते ८० जणांचा जमाव घटनास्थळी जमा झाला आणि या जमावाने बाळासाहेब आवटी यांच्यासह त्यांची पत्नी, अभिषेक सोनवणे, सनी आवटे यांना शिवीगाळ करत मारहाण करायला सुरुवात केली. दगड आणि बेल्टने मारहाण करण्यात आली. यात हे चारही जण जखमी झाले आहेत. यावेळी दगडफेकही करण्यात आली असून परिसरातील झाडांचे नुकसान करण्यात आल्याची माहिती आहे. दरम्यान हडपस पोलीस स्थानकात तक्रार दाखल झाल्यानंतर पोलिसांनी ५ जणांना अटक केली आहे. पोलिसांकडून अधिक तपास सुरू आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)