पुण्यात भाजपचा गड ढासळला; बड्या नेत्याचा पक्षाला रामराम, अजित पवारांच्या राष्ट्रवादीला देणार साथ

स्थानिक स्वराज्य संस्थांच्या निवडणुकीच्या पार्श्वभूमीवर पुण्यात राजकीय घडामोडींना वेग आला आहे. भोरमध्ये भाजपचे नगराध्यक्ष यांनी आपल्या पदाचा राजीनामा दिला आहे. त्यांनी नुकतंच राष्ट्रवादी काँग्रेस अजित पवार गटात प्रवेश केला आहे. आमदार शंकर मांडेकर यांच्या उपस्थितीत हा पक्षप्रवेश सोहळा पार पडला. या पक्षप्रवेशामुळे पुण्यात भाजपला मोठा धक्का बसला आहे.

पुण्यातील भोरमध्ये मोठी राजकीय घडामोड घडली आहे. भोरमधील भाजपचे नगराध्यक्ष निर्मला आवारे यांनी आपल्या पदाचा राजीनामा दिला आहे. आवरे यांनी भोजपला सोडचिठ्ठी देत राष्ट्रवादी काँग्रेस अजित पवार गटात पक्ष प्रवेश करण्याचा निर्णय घेतला आहे. निर्मला आवारे यांचा आमदार शंकर मांडेकर यांच्या उपस्थितीमध्ये पक्ष प्रवेश सोहळा पार पडला.

यावेळी निर्मला आवरे यांच्यासह इतर पक्षातील नगराध्यक्षांनी राष्ट्रवादी काँग्रेस अजित पवार गटात पक्षप्रवेश केला आहे. आवरे यांच्या पक्षप्रवेशामुळे अजित पवार गटाची ताकद वाढली. जे आगामी निवडणुकांसाठी अतिशय महत्त्वाचं मानलं जात आहे. तर आवरे यांच्या निर्णयामुळे भाजप पक्षाला मोठा धक्का बसला आहे.

रायगडमध्ये ठाकरेंच्या शिवसेनेला गळती

रायगड जिल्ह्यात ठाकरेंच्या शिवसेनेला लागलेली गळती अजून थांबायचं नाव घेत नाहीये. श्रीवर्धन मतदार संघात ठाकरेंच्या शिवसेनेला शिंदेंच्या शिवसेनेने मोठा धक्का दिला आहे. श्रीवर्धनमधील माजी जिल्हा परिषद सदस्य अविनाश कोळंबेकर तसेच माजी सभापती अक्षदा कोळंबेकर यांनी आपल्या शेकडो सहकाऱ्यांसह शिंदेंच्या शिवसेनेत प्रवेश केला आहे.

मंत्री भरत गोगावले यांच्या उपस्थितीत सर्वजण शिवसेनेत दाखल झाले. यामुळे मंत्री आदिती तटकरे यांच्या बालेकिल्ल्यात शिवसेनेची ताकद वाढली आहे. जिल्हा परिषद निवडणुकीच्या पार्श्वभूमीवर आदिती तटकरे यांच्या मतदार संघात मंत्री भरत गोगावले यांच्या फेऱ्या वाढल्याने राष्ट्रवादीची डोकेदुखी वाढली आहे.