Shocking: पुण्यातील आयटी इंजिनिअरची आत्महत्या; चिठ्ठीत लिहिली कंपनीतील दोन महिलांची नावं, परिसरात खळबळ

पुण्याच्या आयटी हब असलेल्या हिंजवडीत एक धक्कादायक घटना घडली आहे. एका 48 वर्षीय आयटी इंजिनिअरनं आत्महत्या केली आहे. वरिष्ठ महिला सहकाऱ्यांकडून होणारा कथित मानसिक छळ आणि मित्राकडून होणाऱ्या त्रासाला कंटाळून अमित ब्राम्हे असं या अभियंत्याचं नाव आहे. याप्रकरणी नामांकित आयटी कंपनीतील दोन वरिष्ठ महिला कर्मचाऱ्यांसह एका मित्राविरोधात भोसरी पोलीस ठाण्यात गुन्हा दाखल करण्यात आलाय.

ही घटना २ जून रोजी घडली असून ४८ वर्षीय आयटी अभियंता अमित ब्राम्हे यांनी आपल्या राहत्या घरी गळफास घेऊन जीवन संपवलं. आत्महत्येपूर्वी अमित यांनी दोन पानांची सुसाईड नोट लिहिली होती. यात त्यांनी कंपनीत छळ होत असल्याची बाब समोर आली आहे. या सुसाईड नोटमध्ये त्यांनी आपल्या मृत्यूला कारणीभूत असलेल्यांची नावे स्पष्टपणे लिहिली आहेत. अमित ब्राम्हे यांनी लिहिलेल्या नोटमध्ये कंपनीतील वरिष्ठ सहकारी अर्चना आणि शाश्वती यांच्यावर गंभीर आरोप केलेत.

कामाच्या ठिकाणी त्यांचा मानसिक छळ कसा होत होता हे सांगितलं. चांगले प्रोजेक्ट्स काढून घेणे, जाणूनबुजून अत्यंत कठीण कामे देणे, इतर स्टाफसमोर वारंवार अपमान करणे. नोकरी सोडण्यासाठी सातत्याने दबाव टाकणे, असा छळ होत असल्याचं त्यांनी आपल्या नोटमध्ये म्हटलंय. दोन्ही महिला सहकाऱ्यांकडून सुरू असल्याचा आरोप अमित यांनी केला आहे.

तिघांविरुद्ध गुन्हा दाखल

दोन महिला कर्मचाऱ्यांशिवाय त्यांचा मित्र विनोद पालीचा देखील उल्लेख असून त्यानेही त्रास दिल्याचं म्हटलं आहे. विनोदने अमित यांच्या विरोधात खोट्या तक्रारी केल्या आणि कंपनीत त्यांची बदनामी केल्याच म्हटलंय. या सततच्या त्रासाला आणि अपमानाला कंटाळूनच आपण हे टोकाचे पाऊल उचलत असल्याचं अमित यांनी चिठ्ठीत म्हटलंय. अमित ब्राम्हे यांच्या सुसाईड नोटच्या आधारे भोसरी पोलिसांनी तिघांविरोधात आत्महत्येस प्रवृत्त केल्याप्रकरणी गुन्हा दाखल केला आहे.