Prakash Ambedkar : 'मला मुख्यमंत्री व्हायचं नाही, कारण...; प्रकाश आंबेडकरांनी स्पष्टच सांगितलं

आगामी निवडणुकीच्या पार्श्वभूमीवर वंचित बहुजन आघाडीने जोरदार तयारी केली आहे. राज्यातील विविध भागात वंचित बहुजन आघाडीने मोर्चेबांधणी करायला सुरुवात केली आहे. मागील दोन विधानसभा निवडणुकांमध्ये वंचित बहुजन आघाडीने चांगली कंबर कसली होती. मात्र, मला मुख्यमंत्री आणि मंत्री व्हायचं नाही, असं भाष्य वंचित बहुजन आघाडीचे अध्यक्ष प्रकाश आंबेडकर यांनी केलं. प्रकाश आंबेडकर यांनी केलेल्या मुख्यमंत्रिपदाच्या वक्तव्यावरून राजकीय वर्तुळात चर्चांना उधाण आलं आहे.

माजी खासदार प्रकाश आंबेडकर हे आज पुण्यात होते. यावेळी प्रकाश आंबेडकर यांनी राज्यातील विविध घडामोडींवर भाष्य केलं आहे. ओबीसी आरक्षणावर प्रकाश आंबेडकर म्हणाले, 'धनगर समाजानं ओबीसीच्या लढ्याचं नेतृत्व करावं ही विनंती. २७ टक्के आरक्षण सत्ता मिळवणे हे तेलंगणा राज्यासारखं ६२ टक्क्यांवर देखील नेता येईल. धनगर समाजाने महाराष्ट्र विधानसभेची सत्ता घेऊन हे आरक्षण वाढवावं. तरंच समाजाला न्याय मिळेल'.

स्थानिक स्वराज्य संस्थेच्या निवडणुकीवर भाष्य करताना आंबेडकर म्हणाले, सत्ता ही ओबीसींनी घेतली पाहिजे. लोकांनी अनुसूचित जाती आणि जमातीच्या उमेदवारांना मतदान केलं पाहिजे अन्यथा मुस्लिम उमेदवारांना मतदान केलं पाहिजे. सवर्ण लोकांनी अन्याय केला. ओबीसी लोकांनी त्यांना मतदान करू नये, असं मी आवाहन करतो'.

आपली सगळ्यांची सामाजिक आणि राजकीय ओळख आता ओबीसी म्हणून झाली पाहिजे. सगळ्यांना एकत्रित आणलं पाहिजे. सगळ्या समाजाने एकत्र येऊन त्याची ओळख ओबीसी झालं पाहिजे. ओबीसी समाजाचं नेतृत्व मीच करत आहे. १९८० पासून आम्ही ओबीसी समाजाचं नेतृत्व करत आलो आहे, यात तसूभर देखील बदल केला नाही. आमच्या समाजात प्रमाणिक नेता होत नाही याची खंत आहे. ओबीसी लोकांनी सत्ता आणली पाहिजे, असे ते म्हणाले.

'मला मुख्यमंत्री आणि मंत्री व्हायचं नाही. लोकांना सत्तेत आणण हे काम महात्मा फुले, शाहू महाराज आणि बाबासाहेब आंबेडकरांनी केलं. तेच कार्य पुढे घेऊन जाण्याची माझी इच्छा आहे. तसेच खंडोबा देवाला गोळवलकरपासून मोहन भागवत यांनी एकदा तरी भेट दिली आहे का दाखवावं, असेही आंबेडकर यांनी सांगितलं.