बदलापुरात मोठा राडा; भाजप कार्यकर्त्यावर जीवघेणा हल्ला, कार्यालयही फोडलं, VIDEO

मयुरेश कडव, साम टीव्ही

बदलापुरात नगरपरिषदेच्या निवडणुकीनंतर राडा सुरूच असल्याचं पाहायला मिळत आहे. भाजप कार्यकर्त्यावर जीवघेणा हल्ला झाल्याची घटना उघडकीस आली आहे. भाजप कार्यकर्त्यावर हल्ला झाल्याने शहरातील राजकीय वातावरण तापलं आहे. या प्रकरणी पोलिसांत गुन्हा दाखल करण्याची प्रक्रिया सुरू आहे. या मारहाणीचा प्रकार सीसीटीव्हीत कैद झाला आहे.

मिळालेल्या माहितीनुसार, नयन मुठे असे मारहाण झालेल्या कार्यकर्त्याचे नाव आहे. भाजपचे नयन मुठे यांच्यावर जीवघेणा हल्ला झालाय. आगरआळीतील त्यांच्या कार्यालयाचीही तोडफोड करण्यात आलीय. मारहाणीचा हा संपूर्ण थरार सीसीटीव्ही कॅमेरात कैद झालाय. ही मारहाण सुरज मुठे आणि त्यांच्या साथीदारांनी केल्याचा आरोप नयन मुठे यांनी केलाय.

सुरज मुठे आणि नयन मुठे हे दोघेही भाजपचे कार्यकर्ते आहेत. या निवडणुकीत सूरज मुठे यांचा पराभव झाला. आपल्या विरोधात नयन मुठे यांनी काम केल्याचा राग मनात धरून सूरज मुठे आणि त्यांच्या साथीदारांनी मारहाण केल्याचं नयन मुठे यांचं म्हणणं आहे.

सध्या पोलीस स्टेशनमध्ये या प्रकरणी गुन्हा दाखल करण्याची प्रक्रिया सुरू आहे. या घटनेमुळे बदलापुरातलं राजकीय वातावरण पुन्हा एकदा गढूळ झालंय. या प्रकरणी पोलीस काय कारवाई करतात, हे पाहावे लागले.

कल्याण–डोंबिवलीतही हाणामारीची घटना

कल्याण–डोंबिवलीतही दोन गटात राडा झाल्याची घटना घडली. डोंबिवली पूर्वेतील तुकारामनगर परिसरात भाजप आणि शिंदे गटाच्या पदाधिकारी आणि कार्यकर्त्यांमध्ये जोरदार राडा झाला.ही घटना पॅनल क्रमांक २९ मधील प्रचाराच्या पार्श्वभूमीवर घडली. या पॅनलमध्ये भाजप आणि शिवसेना शिंदे गटात युती नसल्यामुळे दोन्ही पक्ष आमनेसामने आलेत. भाजपकडून कविता म्हात्रे, आर्या नाटेकर, मंदार टावरे, अलका म्हात्रे रिंगणात आहेत. तर शिवसेना शिंदे गटाकडून रूपाली म्हात्रे, रंजना पाटील, नितीन पाटील आणि रवी पाटील हे उमेदवार रिंगणात आहेत.