Politics: बंद दाराआड मुख्यमंत्री, उपमुख्यमंत्र्यांसोबत काय चर्चा झाली? रोहित पवारांनी स्पष्टच सांगितलं

मुंबई: राष्ट्रवादीचे आमदार रोहित पवार (Rohit Pawar) यांनी आज, सोमवारी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांची भेट घेतली. या भेटीनंतर राजकीय वर्तुळात उलट-सुलट चर्चांना उधाण आलं. रोहित पवार यांची मुख्यमंत्री (Eknath Shinde) आणि उपमुख्यमंत्र्यासोबत बंद दाराआड काय चर्चा झाली असावी याबाबत अनेकांनी प्रश्न पडला. अखेर रोहित पवार यांनी स्वतः या भेटीमागचं कारण सांगितलं आहे. पत्रकारांशी बोलताना आपण मुख्यमंत्री आणि उपमुख्यमंत्र्यांची भेट का घेतली याबाबत रोहित पवारांनी स्पष्टीकरण देत उलट-सुलट चर्चांना पुर्णविराम दिला आहे. (Rohit Pawar Latest News)

हे देखील पाहा -

रोहित पवार यांच्या पाठीमागे आता ईडीचा ससेमिराला लागण्याची शक्यता आहे. कारण रोहित पवार संचालक राहिलेल्या ग्रीन एकर कंपनीचे प्राथमिक चौकशी करण्याचे आदेश ईडीने दिल्याची माहिती सूत्रांनी दिली आहे. रोहित पवार कधीकाळी संचालक असलेल्या ग्रीन एकर कंपनीची ईडीकडून चौकशी करण्यास सुरुवात झाली आहे. या पार्श्वभूमीवर रोहित पवार यांनी मुख्यमंत्री आणि उपमुख्यमंत्र्यांची घेतलेली भेट चर्चेचा विषय बनली आहे. १० ते १५ मिनिटं दोन्ही नेत्यांमध्ये चर्चा झाली. मुख्यमंत्र्यांची भेट घेतल्यानंतर रोहित पवार यांनी माध्यमांशी संवाद साधला. यावेळी ते म्हणाले की, विधानसभेमध्ये महाराष्ट्राच्या हिताचा एक निर्णय मांडला होता. युरोपमध्ये जगदंबाची तलवार आहे, अनेक अशा वस्तू बाहेर आहे. त्या भारतात कशा आणाव्या, याबद्दल आम्ही चर्चा केली. तसंच पोलिसांच्या सुट्टीबद्दल आम्ही चर्चा केली, अशी माहिती रोहित पवार यांनी दिली.

दरम्यान, एकीकडे रोहित पवार हे मंत्रालयात पोहोचले होते, तर दुसरीकडे, शरद पवार यांनी ठाण्यात पत्रकार परिषद घेऊन भाजपवर टीका केली. "माझं बोट पकडून राजकारणात आलेले नरेंद्र मोदी इतके महागात पडतील असं वाटलं नव्हतं" असा सणसणीत टोला राष्ट्रवादीचे सर्वेसर्वा शरद पवार (Sharad Pawar) यांनी पंतप्रधान नरेंद्र मोदींना (PM Narendra Modi) लगावला. आगामी महापालिका निवडणुकीच्या पार्श्वभूमीवर शरद पवार हे आज ठाणे दौऱ्यावर आहेत. यावेळी त्यांनी राष्ट्रवादी कॉंग्रेसच्या पदाधिकाऱ्यांशी संवाद साधला. या संवादानंतर त्यांनी ठाण्यात पत्रकार परिषदही घेतली. यावेळी बोलताना पवारांनी मोदी सरकारवर जोरदार निशाणा साधला.

Edited By - Akshay Baisane